Сандықтау ауданы Владимировка ауылының тұрғыны Валерий Взникин бағасы арзан әрі көпфункциялы шағын тракторға қол жеткізген.
Ол бұлтехниканыинтернетпеніздеу арқылыПавлодардан сатып алады. Өйткені, трактордың Қытайда шығарылған баламаларын алайын десе, бағасы тым қымбат әрі ақау шықса, қосымша бөлшектерін іздеп табу қиынға соғады. Сол себепті, қозғалтқышы мен конструкциясы қарапайым көлік қазіргі күні қора-жайдағы малды жайғауда, ауладағы қарды тазалауда таптырмас техника болып тұрғаны сөзсіз.
– Трактор өте шағын, кез-келген ғимараттың есігінен еніп кетеді. Жақтауы да мықты, ауыр жүктерді көтере береді. Үй маңындағы жұмыстарды оның көмегімен тез атқарып шығамын. Малдың астынан шыққан тезекті аулаққа апарып төгу, қар тазалау, шөп тасу шаруаларының барлығы осы трактордың көмегімен атқарылады. Бір жақсысы, қытайлық тракторлардағы секілді күрделі гидромотор, түрлі қымбат резеңкелер мен техникалық шлангілер мұнда жоқ, қарапайым жүйе орнатылған. Бөлшектері істен шықса, жаңасы базарда арзан тұрады. Гидравликалық жүйесіне құйылатын техникалық май да қарапайым әрі арзан екен, – дейді шаруа адамы.
Бұрын «Беларусь» тракторын тізгіндеген В.Взникин ауыл шаруашылығы үшін өте тиімді мұндай отандық көліктерді сатуға мемлекеттің өзі мүдделі болуы керек деп есептейді. Үкімет шетелден келетін техниканы сатып алуға миллиондап субсидия төлегенше, осындай бағасы арзан отандық құралдарға басымдық бергені абзал. Шаруалар үшін мұндай техника таптырмас мүмкіндік.
Асылай ҚАДЫРҚЫЗЫ.
Сандықтау ауданы.
