Ақмола облысының индустриялық орталығы Степногорск қаласыодан әріжаңа серпінмен дамып келеді. ҚР Үкіметі қаланы әлеуметтік-экономикалық дамытудың 2023-2027 жылдарға арналған кешенді жоспарын бекітті.
Жоспар Мемлекет басшысының тапсырмаларын іске асыру мақсатында әзірленді және әлеуметтік қамсыздандырудың негізгі мәселелерін шешуге, сондай-ақ, халықтың өмір сүру сапасын арттыруға бағытталып отыр.
Құжатта денсаулық сақтау, білім беру, спорт нысандарының құрылысы, инженерлік инфрақұрылымды қайта жаңғырту, экономиканың нақты секторын, өнеркәсіпті, АӨК, шағын және орта бизнесті дамыту, халықты жұмыспен қамту, тағы басқалары бойынша 83 шара көрсетілген.
2027 жылға дейін Жоспарды іске асыруға шамамен 107 миллиард теңге бөлу жоспарланған, оның62 миллиард теңгеден астамы жеке инвестициялар есебінен болмақ.
Шығындардың басым бөлігіне (58,3 миллиард теңге) тіршілікті қамтамасыз ететін инфрақұрылымды дамыту және оның тозуын азайту (23 жоба) қарастырылған. Атап айтқанда, жеке инвестициялар есебінен жылу электр орталығын күрделі жөндеуден өткізу жоспарланған.
Жоспарға сәйкес, 2027 жылға қарай қалада өнеркәсіптік өндіріс көлемі 550 миллиард теңгенің деңгейінде қамтамасыз етілсе, өңдеуші сектор өнімі кемінде 70 пайыз болмақ. Жалпы, ауыл шаруашылығы өнімінің көлемі 10 пайызға артады.
Құжатта жұмыспен қамту мәселесі, әсіресе жастарды жұмыспен қамтуға және кәсіпорындардағы кадр тапшылығы мәселесін шешуге ерекше көңіл бөлінген. Денсаулық сақтау саласында медициналық колледж ашу арқылы кадрлық әлеуетті арттыру жоспарланған. Сондай-ақ көрсетілетін медициналық қызметтің жақсаруына орталық қалалық аурухананы күрделі жөндеуден өткізу және техникалық жабдықтау оң әсер етпекші.
Сонымен қатар, экологиялық проблемаларды шешу шаралары жоспарланған. Атап айтқанда, атмосфераға ластаушы заттардың шығарындыларын азайту (9,8 мың тоннаға дейін), өнеркәсіптік кәсіпорындардың қоршаған ортаны қорғау бойынша міндеттемелерін орындауда жауапкершілігін арттыру шаралары бар.
Жақсы және қанағаттанарлық жағдайдағы жолдар үлесін белгіленген мерзімге дейін 74 пайыздан 90 пайызға дейін арттыру жоспарланған.
Еске салайық, Степногорск қаласы мен оған іргелес аймақтардың аумағы 290 мың гектардан астам, халық саны – 68,5 мың адам. Қаланың әкімшілігіне бір ауылдық округ және 9 елдімекен – 4 кент, 5 ауыл кіреді. Өнеркәсіп саласы қала экономикасының драйвері болып табылады. Ақмола облысының өнеркәсіп өндірісіндегі Степногорск қаласының үлесі – 25,3 пайыз.
«Арқа ажарының» өз ақпараты.
