Сақтансаң – сақтар!
Жергілікті әкімдік бастамасымен аудан орталығы Державинск қаласында көктемгі су тасқыны кезеңіне дайындық ретінде оқу-жаттығулары өтті.
Іс-шараның негізгі мақсаты төтенше жағдайлар қызметтері мен ұйымдарының су тасқынына байланысты ықтимал төтенше жағдайларды жоюға дайындығын тексеру болып табылады. Оқу-жаттығуларға 40 адам мен 24 арнайы техника қатысты. Шара барысында әртүрлі жағдайлар пысықталды, оның ішінде қорғаныс құрылыстарын нығайту, жедел қызметтердің іс-қимылдарын үйлестіру және халықты хабардар ету шаралары қарастырылды. Ауданның коммуналдық қызметтері мен бірқатар ұйымдар, соның ішінде «999» ЖК, «Ивахненко» ЖК, «Байсан» ЖШС, «Союз» ұйымы, «Гончаров» ЖК, «Арка-к» ЖШС қорғаныс бөгеттерін күшейту жұмыстарын жүргізді.
– Бұл оқу-жаттығулар күштер мен құралдардың дайындығын тексеруге, өзара іс-қимыл алгоритмдерін пысықтауға және мүмкін болатын әлсіз тұстарды жоюға мүмкіндік береді деп сенеміз. Біздің міндетіміз кез-келген жағдайға дайын болу, – деп атап өтті өз сөзінде аудан әкімі Ербол Жүсіпбеков.
Сондай-ақ, қоғамдық тәртіп қызметтері ықтимал су басу қаупі бар аймақтардағы тұрғындармен түсіндіру жұмыстарын жүргізіп, эвакуациялау шараларын пысықтады.
– Бүгін атқарылған жұмыс су тасқынына дайындық деңгейін арттыруға жақсы мүмкіндік деп білеміз. Біз әртүрлі жағдайларды сынақтан өткізіп, талдау жасадық. Болашақта осындай оқу-жаттығулар жалғасып, соның бірі Пригород ауылында да өткізіледі, – дейді аудандық әкімдіктің жұмылдыру дайындығы, азаматтық қорғаныс және төтенше жағдайлар жөніндегі бөлімінің басшысы Әділхан Қалымтай.
Сөз соңында мұндай оқу-жаттығулардың әдетте су тасқыны қаупін азайту және төтенше жағдайлар қызметтерінің дайындық деңгейін арттыру тұрғысынан пайдалы тұстары көп болатынын айта кетуіміз керек.
«Арқа ажарының» өз ақпараты.
Жарқайың ауданы.
