Алматыдағы Универсиадада өткен демалыс күндері Қазақстан құрамасының қоржынына тағы екі алтын медаль түсті.
Алғашқысын аралас командалық спринтте (6х1.1 шақырым) шаңғышыларымыз Анна Шевченко мен Олжас Климин жеңіп алды. Олар 18:23.48 уақытымен екінші және үшінші орындардағы Франция мен Ресей құрамаларын артта қалдырды. Бұл орайда, ерекше бір атап өтерлігі, жүзден жүйрік шығып, алтыннан алқа таққан Олжас Климин Ақмола облысының спортшысы. Туған елін қуантып жатқан шаңғышы Абай Мырзахметов атындағы Көкшетау университетінде оқиды. Олжас – Алина Райковадан кейін Ақмоладан шыққан екінші Универсиада чемпионы. 
Сондай-ақ, біз бұған дейін биатлоннан ерлер спринтінде жеңіс тұғырының үшінші сатысына көтерілген Роман Ереминді де мақтан тұтуға тиіспіз. Ол да Ақмола облысынан осы Универсиадаға қатысып жатқан 17 спортшымыздың бірі. Сандықтау шаңғы мектебінің түлегі.
Енді ел қоржынына салынған оныншы алтынға келсек, оның иесі – Сочи Олимпиадасының қола жүлдегері Денис Тен. Мұзда мәнерлеп сырғанаушылар арасында өткен ақтық сында ол 94.91 баллмен өз қарсыластарынан оқ бойы озық болды. Сөйтіп, екінші орындағы жапониялық спортшыдан 15 балл көп жинаған Денис өзінің нағыз спорттық бабында екендігін дәлелдеп, Универсиада чемпионы атанды.
28-інші бүкіләлемдік қысқы студенттік ойындар өзінің шешуші шағына ойысты. Әзірге 10 алтын, 4 күміс, 10 қола медальмен Қазақстан құрамасы жалпы командалық есепте екінші орында келеді.
«Арқа ажарының» өз ақпараты.
Суреттерде: универсиада чемпиондары Анна Шевченко мен Олжас Климин жеңіс тұғырында; күміс жүлдегер Роман Еремин.
