Кейінгі жылдары жалпы білім беретін мектептердегі оқулықтардың сапасы сын көтермейтіндігі туралы көп айтылып жүр. Шынында да, кейбір оқулықтарды ашып қарағанда, ондағы үйлеспейтін жайларға көңілің құлазиды.
Жуырда мәселен, жалпы білім беретін мектептің 3-сыныбына арналған музыка оқулығын қарап отырсақ, атақты композитор Бақытжан Байқадамовтың өмірбаянына қоса, «Су тасушы қыз» әнінің мәтіні беріліпті. Қазақ музыка өнерінің ірі өкілдерінің бірі болып табылатын бұл кісінің «Кел, достар», сондай-ақ, балаларға арналған «Айгөлек», «Бөбегім» сияқты небір тамаша әндері бола тұра, кітапты құрастырушылар бұл оқулыққа орысша сөздермен араластырылған «Су тасушы қыз» әнін қалай енгізгендері түсініксіз.
Орыс тіліне құдайдай табынған кешегі дәуірде музыкасы мен ойнақылығына дау жоқ, бұл махаббат әнінің заманы жүріп тұрғанына ешкім де таласа алмайды. Алайда, қазір уақыт өзгеріп, өз тәуелсіздігімізді алып, балаларымызға қазақша үйрете алмай, қиналып жатқан кезеңде, мұндай екі тілде шырқалатын ескі әнді бастауыш сыныптың оқулығына енгізуімізге жол болсын?!. Әрбірден соң бұл қай сасқанымыз дейсің осының байыбына жете алмай.
Асыққан су тасушы водовозбын,
Талайды жолға тастап басып оздым.
Суға емес, қызға әбден шөлдегендей,
Жігітім, неге мұнша мойның создың?
Міне, «Алматыкітап» баспасынан 2014 жылы Ә.Рахметова, А.Маханиязова, Г.Досмағамбетованың авторлығымен шыққан оқулықтың 83-інші бетінде «Су тасушы қыз» әнінің мәтіні осылай шалқып, толқып кете береді. 3-сыныптың «Музыка» оқулығына мейлі, кезінде жұрт аузынан түспеген жақсы ән болса да, осы бір балаларға ретсіз әнді тықпалаған талғамсыздыққа түңілгеннен басқа не дерсің?!.
Жуырда Білім және ғылым министрі Ерлан Сағадиев «Жас Алаш» газетіне берген көлемді сұхбатында былтыр мектептерге арналған оқулықтарды сыни тұрғыдан бағамдап, сараптамадан өткізуге құрамында мектеп мұғалімдері, ғалымдар, депутаттар, тағы басқа жұртшылық өкілдері бар, барлығы 40-тан астам адамнан тұратын комиссияның тартылғанын тілге тиек етті. Ендеше, оқулықтарды осындай ағаттықтардан тазартып, неге балаларымыз оқитын кітаптардың сапалық деңгейін арттырмасқа?! Қашанғы білім саласындағы реформаларда осындай жайлар жиі орын алып, ата-аналардың көңілінде кірбің ұялай береді?!.
Ақкенже САҒЫНБАЕВА.
Аршалы ауданы.
