Қарттар күні біздің селолық округте де жыл сайын салтанатпен атап өтіліп, егде адамдар мен мүгедектерге жылылық пен көтеріңкі көңіл-күй сыйлайтын іс-шаралар ұйымдастырылады.
Мейірім мен қамқорлыққа толы жарқын мерекелердің бірі – Қарттар мен мүгедектер айлығы. Бұл айда әркім өзінің айналасындағы ата-аналарынан бастап, ата-әжелеріне, таныс қарттар мен мүгедектерге, ауыл-аймақтың ақсақалдарына ерекше көңіл бөліп, құрмет көрсетеді.
Айлық кезінде мерекелік шараларды ұйымдастыруды округ азаматтары игі дәстүрге айналдырды. Осындай ізгілікті шараларға жыл сайын «Хлебороб» жауапкершілігі шектеулі серіктестігі демеушілік жасайды. Серіктестіктің директоры Владимир Стихиляс мереке аясында қарттар мен мүгедектерге ақшалай сыйлық пен материалдық көмек береді. Сонымен бірге, округтегі зейнеткерлер де ескерусіз қалмайды, оларға да мазмұнды
іс-шаралар ұйымдастырылып, дөңгелек үстелдер, мерекелік түстік ас пен концерттік кештер ұйымдастырылады. Жыл сайын аталмыш серіктестік есебінен қарттар мен мүгедектерге айлық аясында 1,5 миллион теңге көлемінде қаржы бөлінеді. Қарттарға деген мейірім мен қамқорлық біздің еліміз бен қоғамның алдында тұрған басым міндеттердің бірі. Осы үдеден шығу біздің басты мақсатымыз.
Халқымыздың асыл қасиеттерінің бірі – қарияларын мерекелік айлық кезінде ғана емес, үнемі құрметтеп, сүйеу болып, демеп жүретініміз. Сондықтан, бұл мейрамдағы ізгілік пен ілтипат та осы сөзіміздің айқын көрінісі болмақшы.
Александра ЩЕТИНИНА,
Наумовка селолық округі әкімі аппаратының бас маманы.
Ақкөл ауданы.
