Шахмет Құсайынов атындағы қазақ музыкалық-драма театрының режиссері Фархадбек Қанафин өз ісінің кәсіби шебері. Ізденімпаз режиссер көрермендер назарына талантты драмалық шығармаларды сәтті ұсынып жүр. Мысалы, М.Байжиевтің «Арман – ақжелкен» драмасын, М.Кәрімовтің «Ай тұтылған түн» трагедиясы көкшетаулық талғампаз көрерменнің көңілінен шықты.
2010 жылы Фархадбек Қанафин сахналаған С.Раевтың «О, қыздар» драмасы режиссердің өз қолтаңбасының айшықты екендігін аңғартатын қойылым болды. Сондай-ақ, неміс драматургі И.Лаузундтің «Офис» драмасы жақсы бағасын алды. Аталмыш қойылым барысында бақталастық, жағымпаздық, мейірімсіздік, үрей, кісінің кісіні кемітуі ашып көрсетіледі. Осының барлығы қай қоғамда болмасын кездесетін жат пиғылдар. Аталмыш қойылым 2013 жылы Тараз қаласында өткен бірінші республикалық театр фестивалінде «Ең үздік актерлік ансамбль» аталымына ие болды.
Театрдың жаңа маусымында да Фархадбек Аманжолұлы балалар мен жастарға арналған бірнеше шығармаларды сахналауға дайындық жүргізуде.
