– Елімізде жыл сайын Тәуелсіздік мерекесі күні әлеуметтік-өндірістік нысандарды пайдалануға беру дәстүрге айналған. Біздің облысымызда да жаңадан тұрғызылған, заманауи, келісті де келбетті тұрғын үйлер мен өндірістік нысандар көптеп салынуда. Бүгін өздеріңіз куә болып отырғандай салтанат сарайын ашып отырмыз. Мұнда тек неке қию рәсімі ғана орындалып қоймайды, сонымен қатар, түрлі деңгейдегі мазмұнды шаралар да өткізілетін болады, – деді Мәлік Мырзалин құттықтау сөзінде.
Қос қабатты ғимараттың құрылысын бас мердігер «Ақ сәуле» жауапкершілігі шектеулі серіктестігі жүзеге асырған. Ғимарат киіз үй үлгісінде салынған. Сәулеті келіскен, қазіргі заман талабына сай мұндай ғимараттар республиканың бірқатар облыс орталықтарында ғана кездеседі. Бірінші және екінші қабаттар өзара бөлінбейді, яғни, бәрі бір шаңырақ астында.
Ғимараттың жалпы аумағы 1797,1 шаршы метрді құрайды. Нысанның астыңғы бөлігінде кіреберіс зал, киім ілетін орын, азаматтық хал актілерін тіркеу кеңсесі, қонақ бөлме, күйеу жігіт пен қалыңдықты салтанатты рәсімге дайындайтын бөлмелер, қызметшілердің кабинеттері орналасқан. Салтанат залынан бөлек үш холл, касса, фотограф, бухгалтерия бөлмелері бар. Жаңадан еңсе тіктеген Неке қию сарайында азаматтық хал актілерін жазу бөлімі қызметі үшін барлық жағдай қарастырылған.
Нысанның ашылу салтанатына қатысқан облыс әкімі қоғамның ұясы – отбасын құрудағы алғашқы қадам некені салтанатты тіркеуден басталатынын атап өтті.
Салтанатты шара барысында облыс әкімі осы сарайдың табалдырығын алғашқы болып аттаған сегіз жұптың неке қию рәсіміне куә болып, жас отбасыларды қуаныштарымен құттықтады.
Аслан ОСПАНОВ,
Ырысалды ШАМШИЕВА,
«Арқа ажарының» өз тілшілері.
