Облыс әкімі Сергей Кулагин Көкшетау қаласындағы бірқатар өндірістік және әлеуметтік нысандарда болып, шағын және орта бизнес субъектілерінің аяқ алысына назар аударды, қаладағы салынып жатқан құрылыстардың қарқынына зер салып, байқалған олқылықтарды түзетудің мүмкіндіктері мен жолдарын қарастырды.
Облыс әкімі алдымен Жайлау шағын ауданындағы «ДВА Кита» жауапкершілігі шектеулі серіктестігіне ат басын бұрып, жиһаз цехының жұмысымен танысты. Бүгінгі күні серіктестік республика бойынша жиһаз жасаудағы ең озық құрал-жабдықтармен қамтамасыз етілген. Оның ең алғашқылары сонау 2005 жылы сатып алынған болатын. 2012 жылы кәсіпорында жаңғырту жұмыстары жүргізіліп, тағы басқа да жаңа қондырғылар орнатылды. Қазір мұнда үй, кеңсе жиһаздарының бірнеше түрі шығарылып, республиканың түкпір-түкпіріне жөнелтілуде. Цехтың жылына 720 тонна өнім өндіретіндей қуаты бар. Бір ауысымда 200-250 жиынтық жиһаз дайындалады. Жұмысшылардың орташа айлығы да 91 мың теңге көлемінде. Кәсіпорын жұмысымен танысқан өңір басшысы бұл межемен шектеліп қалмай өндіріс қуатын 1 миллион тоннаға жеткізу қажеттігін баса айтты.
Бұдан кейін облыс әкімі «Элеватормельмонтаж» жауапкершілігі шектеулі серіктестігінде болды. Кәсіпорын басшысы Илья Бабаринов облыс әкімін құрылыс-монтаж жұмыстарының барысы жайлы хабардар етті. Оның айтуынша, биылғы жылдың алғашқы екі айының өзінде кәсіпорын 93 миллион теңгенің өнімін өндірген. Дегенмен, серіктестік жұмысына кедергі келтіріп отырған кейбір мәселелер де бар көрінеді. Оның ішінде кәсіпорынның ала алмай жүрген кейбір қарыздары қордаланып қалған.
Ал, №2 орта мектепте болған облыс әкімі аталған білім ордасының жанынан салынып жатқан 500 оқушыға арналған ғимараттың белгіленген мерзімінен кешігіп отырғанына назар аударды. Мердігерлер қаржының дер кезінде аударылмағаны құрылыс жұмыстарына қолбайлау болып отырғанын алға тартуда. Дегенмен, облыс әкімі қаржының жақын күнде
аударылатынын және құрылыс жұмыстарын алдағы үш айдың ішінде толық аяқтауды шегелеп тұрып тапсырды.
Сонымен қатар, өңір басшысы өткен жылы күрделі жөндеу жұмыстары жүргізілген «Оқжетпес» футбол клубының стадионында, аспаздық және қоғамдық тамақтану орны
«Бисквит-Мастер» дүкенінде болды. Осы орайда, облыс әкімі
Сергей Кулагин «Оқжет-пес» футбол клубының стадионындағы кейбір кемшіліктерді өзі аралап жүріп көрсетіп, жұмыс барысында түзетілетініне сенім білдірді. Қала басшылығына стадионның қар басқан алаңын ертеңнен бастап, тазартуды тапсырды. Ал, «Бисквит-Мастер» дүкенінің басшылығына азық-түлік сөрелерінде жергілікті өнім үлесінің мол болуына назар аудару қажеттігін қадап айтты.
