аялдаманың жоқтығына өкпелі
Жұртшылықты мазалаған әлеуметтік мәселелерді шама-шарқынша көтеріп жүрген газетімізге жуырда еңбек ардагері Жайлаубай Қасым атамыз келіп, бізден облыс орталығының кей бөлігінде не себепті аялдамалардың жоғын біліп беруімізді сұраған еді. Ақсақалдың өтінішімен біз мәселені жан-жақты зерттеуге кірістік.
Аптап ыстықта күннен қорғанып, желде ықтап, нөсерде жауыннан паналар дүңгіршектердің қала тұрғындары үшін ауадай қажет екені белгілі. Жазда екі күннің бірі жауынды-шашынды келетін біздің өңірде қоғамдық көлікпен жүретіндер көтерген бұл мәселе айрықша өзекті. Біз мәселенің анық-қанығын білмек болып, Көкшетау қалалық энергетика және тұрғын үй-коммуналдық шаруашылығы бөліміне хабарласқан едік.
Бөлімнің техникалық қадағалау секторының меңгерушісі Төлеубек Ыбыраевтың айтуынша, облыс орталығында 247 аялдама бар. Оның 146-сына павильон орнатылған. Ал, қалғаны техникалық талаптарға байланысты дүңгіршектер орнатуға жатпайтын алаңдар екен. Ол жерлерде адам да, көлік те аз жүріп-тұратын көрінеді. Осы іске жауапты маманның сөзіне сенер болсақ, құны 500 бен бір миллион теңгенің арасында болатын павильондар қажетті жерлердің бәрінде тұр.
Мәселенің түп-төркіні Абай көшесінен шыққандықтан, қаланың осы орталығында дүңгіршектердің болмау себебін сұрап білдік. Бұл – осы көшеде 2013 жылы басталған күрделі жөндеу жұмыстарына байланысты екен. Биыл аяқталады деп күтіліп отырған жөндеуден кейін көшеде автокөлік, жаяу жүргіншілер жолдары жаңғыртылып, жан-жағы абаттандырылып, тұрғындардың игілігіне су жаңа павильондар қойылады деп күтілуде. Қаладағы аялдамаларға қатысты «жыр» осымен бітер деген ойдамыз.
