Өткен жылдың 2 қарашасында «Қазақстан Республикасының Жер кодексіне өзгертулер мен толықтырулар енгізу туралы» Заң қабылданғаны белгілі.
Аталмыш өзгертулерде жерді пайдаланушылардың жалға алған жер телімі Қазақстан Республикасы азаматтарының жекеменшігіне сатылатыны қарастырылған. Олар жер телімінің құнын 10 жыл ішінде жеңілдік бағамен төлейді. Заңда оралмандар мен шетелдік азаматтар үшін жалға алудың мерзімін 10 жылдан 25 жылға дейін ұзарту қарастырылған. Ондағы мақсат – мемлекеттің активін үстем етіп, ауыл шаруашылығына қосымша инвестиция тарту. Бірақ, мемлекеттік қызметкерлердің осы тұрғыдағы жеткіліксіз жұмысы, кейбір заң нормаларының дұрыс түсіндірілмеуі қабылданған өзгертулердің мақсатын тұрғындардың түсінбеуіне алып келді. Елбасына түскен көптеген өтініштерге байланыс-ты ел арасында осы түсінік жұмыстарын жүргізу үшін мораторий жарияланды. Мораторийдің мақсаты – Қазақстан Республикасы азаматтарының ұсынысын нақтылау. Осының өзінен Елбасының жүргізіп отырған оң саясатын аңғарамыз. Өзіміз өткізген кездесулерде аудан тұрғындары Мемлекет басшысының қабылдаған шешімін қолдайтынын аңғардық.
Серкеш ЖАНАБАЕВ,
Сандықтау аудандық жер қатынастары бөлімінің басшысы.
