Кеңес Одағының Батыры, даңқты қолбасшымыз Бауыржан Момышұлы ең алғаш наградаға 1942 жылдың сәуірінде ұсынылған екен, алайда, ол белгісіз себептермен ескерілмей қалған.
1942 жылдың 10 сәуірінде толтырылған аттестаттау парағында жазылған деректерге сүйенетін болсақ, онда батыр алғаш рет наградаға ұсынылғандығы жазылған. Аттестациялау қағазында: «Капитан Момышұлы Бауыржан – қабілетті, қайратты, қайсар, өзіне және өзінің қарамағындағыларға талап қоя білетін командир. Неміс басқыншыларына қарсы ұрыстарда жеке басының батырлығын және жанқиярлық қаһармандығын көрсетті. Шайқастарда көрсеткен ерлігі үшін дивизия басшылығы жолдас Момышұлын жоғарғы үкіметтік наградаға – Ленин орденіне ұсынады. Жоғарғы ұйымдастырушылық қабілетті меңгерген және полк бөлімшелерінің ұрыс қимылдарын ептілікпен басқарады. Полк командирінің орынбасары лауазымына сай және кезекті «майор» әскери атағын беруге лайықты» делінген.
Өкінішке орай, аталған награда Халық Қаһарманы, көрнекті қолбасшы, батыр Бауыржан Момышұлының қолына тиген жоқ. Ресми түрде ұсынылған награда жазба күйінде қалып, іс жүзінде орындалмаған. Себебі, белгісіз. Ал, батырға Калинин майданы басшылығының 1942 жылғы 6 маусымдағы
№0196 бұйрығы бойынша берілген ең алғашқы награда «Қызыл Жұлдыз» ордені.
