Отанымыздың астанасындағы жоғары оқу орындарында білім алған жерлес студенттерге өзіміздің облыстың аумағында жұмыс істеулері үшін барлық жағдай тудырылады. «Жас келсе іске» дегендей, түлектер де туған жерін түлетуге дайын.
Кеше түлектердің диплом алу рәсіміне арнайы қатысқан облыс әкімі Мәлік Мырзалин осындай пікір білдірді. Биыл Л.Гумилев атындағы Еуразия Ұлттық университетін әртүрлі мамандықтар бойынша 278 ақмолалық жастар бітіріп шықса, олардың14-і үздік диплом иегері.
Астанадағы абыройы асқақ университет пен облыстық әкімдік арасында әріптестік туралы меморандумға қол қойылған. Осы меморандум негізінде әр жыл сайын 10 студентке әкімдік есебінен грант бөлінеді. Бұл көмек болашақта білікті маман атанып, облыстың сан алуан саласында адал қызмет ететін мамандарға арнайы жасалып отыр.
–Егер бізге келіп жұмыс істейміз деген ниет білдірсеңіздер, әрдайым құшақ жая қарсы аламыз, әлеуметтік-тұрмыстық жағдайларыңызды жасау үшін қолымыздан келген көмегімізді аямаймыз. Мұндай көмек жерлестерімізге ғана емес, диплом алып жатқан барлық жастарға көрсетілетін болады,–деді өңір басшысы.
Бірқатар студенттерге өңір басшысы дипломдарын өз қолымен табыс етті. Олардың әрқайсысымен жеке-жеке тілдесіп, туған өлкелерінде қызмет істеуге шақырды. Тіпті, мүмкіндігі шектеулі студентке де арнайы жолығып, бүгінгі қуанышына ізгі тілегін білдірді.
–Жалпы жұмыс берушілер біздің түлектерімізге қызығады. Тіпті, кезекке де тұрады. Сондықтан, жастардың жұмысқа орналасу мәселесінде ешқандай қиындық жоқ,–дейді Еуразия Ұлттық университетінің ректоры Ерлан Сыдықов.
Сөз арасында қолдарына диплом жаңа тиіп жатқан жастардың басым бөлігі жұмыс орындарын тауып та қойғандығын айта кеткен жөн.
–Ақпараттық технологиялар саласында қызмет еткім келеді,–дейді Әйгерім Мирсан,–мен осы алған білімім бойынша өндірістік тәжірибеден өттім. Сол кезде менің біліктілігім жақсы деген пікір айтылды. Енді университет қабырғасында алған білімімді балғын тәжірибемізбен ұштастыра отырып, туған елімізге қалтқысыз қызмет етеміз.
Әр жыл сайын грант бөлудің көздеген нысанасы да осы. Білімді де білікті жастарды өңірдің, өңірдің ғана емес, еңселі еліміздің абыройын асқақтатар дәрежеге жетулері үшін сапалы біліммен қамтамасыз ету.
Оңғар АЛПЫСБАЙҰЛЫ,
журналист.
