Таяуда облыстық мектеп-интернатында білім ордасын 1972 жылы тәмамдаған түлектер 45 жылдан кейін қайта қауышып, сыныптастар кешін ұйымдастырды. Аталмыш кездесуге түлектердің әрқайсысы айрықша тебіреніспен дайындалғанын аңғару қиын емес.
Олар бұл шараны өткізбес бұрын, кейінгі жылдары отбасы жағдайымен, бала-шағаларының қамымен еліміздің әр өңіріне қоныс аударған сыныптастарына хабар берді. Дәріс берген ұстаздарын іздестірді. Олардың көбі әлдеқашан өмірден өтіп кеткен екен.
«Адамның адамшылығы – жақсы ұстаздан» демекші, кез-келген шәкірттің өміріндегі қымбат адам – ұстаз. Жақсы мұғалімнің есімі шәкірт жүрегінен өшпейтіні бар. Айтжан Хасенов, Лиза Жарқынбаева, Қаншайым Бубенеева, Балғожа Көкенов, Жылқайдар Нұркеев, Кенжебай Сағындықов, Дәржан Ниязбекова, Эрна Шейфер, Нұрмаш Молдахметов, Балқадиша Саменова, Гүлбайрам Жакеева тағы басқа ұлағатты ұстаздарын кешке жиналғандардың барлығы ыстық ілтипатпен еске алды.
Адамның бойындағы игі қасиеттер оның болашақта өз ісіне адал, әділ болуына септігін тигізеді. Осы тұрғыда облыстық мектеп-интернаттың тәрбиешілерінің еңбегі зор. Олардың қатарында Дәржан Ниязбекқызы, Балқадиша Қайырбайқызы, Қаншайым Сағындыққызы, Айтжан Оспанұлы, Нағима Мұхамбетжанқызы, Гүлбарам Дәрменқызы бар.
Уақыт зымыран, бір орнында тұрмайды. Қырық бес жыл бұрын аталмыш білім ордасынан түлеп ұшқан қыз-жігіттер қазір самайларын ақ шалып, пайғамбар жасына жетіп, бүгінде ел ағалары мен ардақты аналарға айналды. Кездесу кешінде сағынысып қауышқан сыныптастар бір-біріне ілтипат білдіріп, ізгі, ақжарма тілектерін арнады.
Айман ЗӘЛЕЛҚЫЗЫ.
Көкшетау қаласы.
