Осыдан 79 жыл бұрын адамзат тарихында өшпес із қалдырған – Ұлы Отан соғысы басталды. Халық тағдырымен тығыз байланысты бұл оқиғаны біз тарих парақтарынан алып тастай алмаймыз. Отан қорғауға ерлер мен әйелдердің құқығы тең болған еді. Олар Отан үшін күресіп, жауға қарсы тұрды. Шығыстың қос батыр қызы Мәншүк Мәметова мен Әлия Молдағұлова осы зұлматтың құрбандары болды. Соғыстың барлық ауыртпалығын қарапайым солдаттар мен офицерлер көтерді. Олар қажыр-қайратымен Жеңісті жақындата түсті. Төрт жылға созылған зұлматты еңсеріп, көптен күткен Жеңіс қуанышы әлемге жайылды, тарихымызда мәңгілікке жазылып қалды.
Ата-бабаларымыз майданда жан аямай арпалысты. Олар біз үшін, болашақ үшін, туған жер үшін жауға қарсы тұрып, үлкен ерлік көрсетті. Майдангер аталарымыз бен әжелеріміздің ерліктерін мақтан тұтып, оны келешек ұрпақтың естерінде мәңгі қалдыру – әр адам баласының міндеті. Біз енді осы ата-бабаларымыздың үмітін ақтауымыз керек. Себебі, болашақ біздің қолымызда.
Бүгінгі ұрпақ – өзіміздің бейбіт өмірімізде, алаңсыз күлкімізде, тыныш ұйқымызда, тербелген тал бесіктің қуанышында. Отанды қорғаған аталарымыз бен әжелеріміздің мәңгілік үлесі тұрғанын ұмытпай, олардың ұрпаққа аманат етіп қалдырған Ұлы Жеңісін қадірлей білейік.
Роза СӘДУАҚАСОВА,
Көкшетау қаласындағы №15 «Әсел» балабақшасының тәрбиешісі.
