«Nur Otan» партиясының облыстық филиалы Степногорск қаласында мүмкіндігі шектеулі азаматтар үшін көшпелі қабылдау ұйымдастырды. Партияның облыстық филиа-лы ұйымдастырған бұл көшпелі қабылдау «Кедергісіз келешек» партиялық жобасы аясында өтті. Индустриалды шаһардың ондаған тұрғыны партиялықтарға өздерінің мұң-мұқтажын айтып, алаңдатқан мәселелерін айтуға асықты. Қабылдау облыстық бірнеше басқарма жетекшілерінің қатысуымен өтті.
Бүгінде Степногорск қаласында 2 мыңнан астам мүмкіндігі шектеулі азамат тұрады. Тұрғындарды мүгедектікті тағайындау, жұмыспен қамту, жеке көмекші тағайындау, мүгедектің жүріп-тұруына қажет қозғалыс құралдарымен қамту (мүгедектер арбасы, балдақ және тағы басқалары) мәселелері толғандырады. Аталған мәселелер бүгінде партияның облыстық филиалының бақылауына алынып, мүмкіндігінше оңтайлы шешілуде. Мәселен, көшпелі қабылдау барысында бірінші топтағы мүгедек Г.И.Кравченконың жеке көмекшімен қамту туралы өтініші бірден шешімін тапты. Ал, мүгедектікті тағайындау мәселесі облыстық денсаулық сақтау басқармасына зерттеп, зерделену үшін бағытталды. Қабылдауға келгендердің барлық өтініштері құзіретті орган өкілдерімен бірлесіп, қаралатын болады. Жалпы, ағымдағы жылдың 24 маусымындағы дерек бойынша облыстың 3 мыңнан астам тұрғыны партияның қоғамдық қабылдауында болған. Келіп түскен өтініштердің 53 пайызы оң шешімін тапты.
Венера ТАЛҒАТҚЫЗЫ,
«Арқа ажарының» өз тілшісі.
