Қазақстан Республикасының Премьер-Министрі Асқар Маминнің төрағалығымен өткен Үкімет отырысында елдегі санитарлық-эпидемиологиялық ахуал, соның ішінде коронавирусқа қарсы карантиндік талаптарды күшейту және халықты вакциналауды жеделдету мәселелері қаралды.
Қазіргі жағдай мен халықты вакциналау барысы туралы Денсаулық сақтау министрі Алексей Цой, Нұр-Сұлтан қаласының әкімі Алтай Көлгінов, Қызылорда облысының әкімі Гүлшара Әбдіқалықова, Ақтөбе облысының әкімі Оңдасын Оразалин, кәсіпкерлік субъектілерін «Ashyq» жүйесімен қамту туралы «Атамекен» ҰКП басқарма төрағасының бірінші орынбасары Нариман Әбілшайықов баяндады.
Қазақстандағы санитарлық-эпидемиологиялық жағдай баяу өсу үрдісіне ие және біртіндеп тұрақтануда. Вирустың репродуктивтік индексі – 1,01 құрайды, инфекциялық төсек-орындар 54 пайыз, реанимациялық төсектер 45 пайызға толды. Бүгінгі таңда 5,9 миллионға жуық адам бірінші компонентті, шамамен 4,5 миллион адам екінші компонентті алды. Үкімет басшысы биыл тамыз айында вакциналау жоспарының орындалуын қамтамасыз ете отырып, әсіресе, Батыс Қазақстан, Маңғыстау және Атырау облыстарында вакциналау қарқынын күшейту қажеттігін атап өтті.
Премьер-Министр Нұр-Сұлтан, Алматы және Шымкент қалаларына, сондай-ақ, Қарағанды облысына ерекше назар аудара отырып, барлық өңірдегі санитарлық-эпидемиологиялық жағдайды бақылауда ұстауды тапсырды. Сонымен қатар, халықтың шектеу шараларын, ең алдымен маска тағу режимін сақтауын қамтамасыз ету қажет екені атап өтілді. Ол үшін карантин талаптарын бұзушыларды жауапкершілікке тарта отырып, мониторингтік топтардың жұмысын жандандыру тапсырылды.
«Ashyq» жүйесіне қатысатын кәсіпкерлік субъектілерінің саны үнемі артып келеді. Олардың саны 5 есеге – 21 мыңнан 101 мыңға дейін өсті. Бұл бизнеске өз қызметін жалғастыруға мүмкіндік береді. Сондықтан, «Ashyq» қосымшасының қолданылу аясын одан әрі кеңейту қажет», – деді Асқар Мамин.
«Арқа ажарының» өз ақпараты.
