Осындай тақырыпта Көкшетау қаласындағы «Достық» үйінде Ақмола облыстық «Рухани жаңғыру» өңірлік жобалық кеңсесінің ұйымдастыруымен өткен онлайн байқаудың жеңімпаздарын марапаттау салтанаты болып өтті.
18-25 жас аралығындағы жастар қатысқан байқаудың басты мақсаты – еліміздің тәуелсіздік алу жолындағы ата-бабаларымыздың ерлігін паш ету, жас ұрпақтың туған өлкемізге деген сүйіспеншілігін, патриоттық сезімдерін ояту, елін, жерін сүюге, Отанын қастерлеуге тәрбиелеу болып табылады. Сөз додасына қатысушылар тәуелсіздіктің 30 жылдығына арналған төл туындыларын жатқа айтып, шығарылған өлең тақырыбына сай бейнеролик жасауы керек болатын.
Қазақстан Жазушылар одағының Ақмола облыстық филиалының төрағасы Мерген Тоқсанбай бастаған қазылар алқасының шешімімен жүлделі бірінші орынды Мәлік Ғабдуллин музейінің қызметкері Оралбек Нүріш жеңіп алды. Жүлделі екінші орынды Қазақстан Жазушылар одағының мүшесі Абылайхан Әшімхан иеленсе, Ш.Уәлиханов атындағы Көкшетау университетінің студенті Мерей Бектұр үшінші орыннан көрінді.
Сонымен қатар, Біржан сал атындағы Көкшетау музыкалық колледжінің студенті Мұхаметжан Айдынбек, Ақан сері атындағы жоғары мәдениет колледжінің студенті Дина Тоқтасын және Ш.Уәлиханов атындағы Көкшетау университетінің студенті Ақбота Мұхаметбековаға ынталандыру сыйлықтары табыс етілді.
Ұлмекен ТЫНЫШТЫҚҚЫЗЫ,
«Арқа ажарының» өз тілшісі.
