Президентке биылғы бірінші тоқсан нәтижелері туралы баяндаған Қаржылық мониторинг агенттігінің төрағасы Жанат Элиманов елден заңсыз шығарылған 28 млн АҚШ доллары бұғатталғанын мәлім етті, деп хабарлайды ҚазАқпарат Ақордаға сілтеме жасап.
Президенттің тапсырмасы аясында қаржыны Қазақстаннан тыс жерлерге заңсыз жылыстатуға қарсы жұмыстар өндірісте. Агенттік төрағасының айтуынша, 7 қылмыстық іс тергеліп жатыр.
Мемлекет басшысы Агенттіктің қылмыстық жолмен алынған кірістерді заңдастыруға және көлеңкелі экономиканың деңгейін төмендетуге қарсы іс-қимыл жөніндегі жұмыстарының маңызды екенін ерекше атап өтіп, Жанат Элимановқа бизнеске қатысты жүргізіліп жатқан барлық қылмыстық істі тергеп-тексеру кезінде заңдылықтың мүлтіксіз сақталуын қамтамасыз етуді тапсырды.
Президенттің пікірінше, құқық қорғау және бақылаушы органдар кәсіпкерлердің өтініштеріне жедел назар аударуға және олардың құқығын шектемеуге тиіс. Бұған дейін Мемлекет басшысы Қаржылық мониторинг агенттігінің төрағасын қабылдағаны туралы жазылған.
