Жуырда Қазақстан Республикасы Жоғарғы Сотының бұрынғы төрағасы Михаил Малахов Ақмола облыстық сотында болып, ұжым мүшелерімен кездесті.
Бұл кездесудің өзіндік сыры бар. Михаил Федорович 10 жылдан астам Көкшетауоблыстық сотында судья, содан кейін төрағаның орынбасары болып қызмет атқарған болатын.
Осы жолы отставкадағы судьяға өңірдің, елдің сот жүйесінің дамуы мен қалыптасуына сіңірген еңбегі үшін«Көкшетау қаласының құрметті азаматы» атағы берілді.
Судьялармен кездесуде ардагер 50 жыл бұрын Ақмола өңіріне алғаш рет келіп, еңбек жолын бастағаны туралы естеліктермен бөлісті. Соғыстан кейінгі жылдардағы, кеңестік дәуірдегі соттардың алғашқы ұжымдарын, ардагер судьяларды еске түсірді.
Облыстық сот төрағасы Арман Жүкенов өз сөзінде Михаил Федорович Малаховтың өмір және еңбек жолының, өз ісі мен еліне, сот жүйесіне адал болудың үлгі-өнегесі екендігін атап өтті. Судьялар сот қонағын құрметті атағымен құттықтап, зор денсаулық, ұзақ ғұмыр, аман-саулық пен ашық аспан тіледі.
Ақмола облыстық сотының баспасөз қызметі.
