Қазақстан Республикасының Президенті Қасым-Жомарт Тоқаев орталық атқарушы органдар басшылары мен әкімдердің халыққа есеп беру кездесулерін өткізудің жаңа тәртібін бекіткен болатын. Сол тәртіп бойынша барлық деңгейдегі әкімдер халыққа есеп беру кездесулері барысында елде іске асырылып жатқан реформалар, өңірді одан әрі дамытудың міндеттері мен негізгі бағыттары, проблемалық мәселелер және оларды шешу бойынша жоспарлар туралы хабардар етіп, есеп беру кездесуін өткізерден бір күн бұрын және одан кейін азаматтарды жеке қабылдаулары керек.
Қосшы жас қала болса да даму қарқыны жоғары
Облыс әкімі Ермек Маржықпаев Қосшы қаласы, Целиноград, Қорғалжын, Аршалы, Ерейментау, Шортанды аудандарында халыққа есеп беру кездесулерін өткізіп, өтініштерін айта келген ел азаматтарын жеке мәселелері бойынша қабылдады. Сонымен қатар, қала және аудандарда орналасқан бірқатар әлеуметтік-экономикалық нысандарды аралап, тиісті сала басшыларына нақты тапсырмалар берді.
ҚОСШЫ. Облыс әкімі Ермек МАРЖЫҚПАЕВ қала тұрғындарымен өткізген кездесу барысында алдымен облыстың әлеуметтік-экономикалық даму барысына тоқталды. Өңірдің әлеуетін танытатын бірқатар ауқымды іс-шараларды баяндап, алдағы жоспармен бөлісті. –Мемлекет басшысы Қасым-Жомарт Тоқаевтың тапсырмалары орындалуда. Өңір өнеркәсібінің даму қарқыны 2022 жылы республикалық рейтингте көшбасшы болды.
Әлемдегі күрделі саяси және экономикалық жағдайға қарамастан, өнеркәсіп секторында жоғары технологиялық, бәсекеге қабілетті, экспортқа бағдарланған өнімдер өндірісін ұлғайту және өнеркәсіпті орнықты дамытудың оң нәтижелері сақталған. Соңғы он жылда облыста жалпы өңірлік өнім құрылымында өнеркәсіп секторы басым бағытқа ие болып отыр, – деп атап өтті өңір басшысы, –мәселен 2021 жылмен салыстырғанда былтыр өнеркәсіп саласы 13 пайызға артты.
Соңғы 3 жылда өнеркәсіп өндірісі мен құрылыс жұмыстарының көлемі 2 есе ұлғайды. Ауыл шаруашылығының жалпы өнімінің көлемі 1,1 триллион теңгеге жетті. Мал шаруашылығы саласында да оң динамика байқалады. Жалпы, агроөнеркәсіптік кешенді инвестициялық қолдау 122 миллиард теңге қаржыға тең.
Облыстың арнайы автомашиналар өндірісіндегі үлесі 65 пайыз төңірегінде болса, алтын кенінің үлесі 55 пайыз шамасында. Инвестиция 567 миллиард теңгені құрайды. Жалпы өткен жылы өңірімізде инвестицияның өсу қарқыны 2 есе ұлғайды. Халықты тұрғын үймен қамтамасыз ету жұмысы қарқынды жүргізілуде. Биыл барлық қаржыландыру көздері есебінен 5,5 мың тұрғынды жаңа баспанамен қамту мақсатында 650 мың шаршы метр тұрғын үйді пайдалануға беру жоспарлануда.
Кездесу барысында облыс әкімі Қосшы қаласының қала болып қалыптасқанына аз уақыт өтсе де бүгінгі таңда шаһар қарқынды дамып келе жатқандығын атап өтті. Осыған байланысты жергілікті тұрғындардың саны жыл сайын арта түсіп, қалада әлеуметтік инфрақұрылымдар бой көтеруде. Соңғы үш жылда оқушылардың саны көбейіп, жыл сайын орта есеппен мың балаға артуда.
Бұл мәселені шешу үшін биылғы жылы қалада бірнеше жаңа әлеуметтік нысан пайдалануға берілетін болады. Атап айтсақ, төрт жаңа мектеп, бір дене шынықтыру-сауықтыру кешені мен 280 орынға лайықталған балабақша пайдалануға беріледі. Жалпы Қосшы қала мәртебесіне ие болғаннан бері аймақтың инвестициялық әлеуеті артып отыр.
Оны көптеп ашылған бизнес нысандары мен инвесторлардың қызығушылықтарынан байқауға болады. Айталық, қазіргі таңда қалада 2,5 мыңнан астам шағын және орта кәсіп субъектілері жұмыс істеп тұр. Жаңа жұмыс орындарына жергілікті тұрғындар тартылуда. Орташа жалақы мөлшері 300 мың теңгеден астам. Құрылыс нысандарына жауапты мердігерлердің жұмысын жіті қадағалау керек деді өңір басшысы. Өткен жылы заманауи жабдықталған емхана ашылды.
Алдағы уақытта облыстық аурухананың құрылысы басталады. Қазіргі таңда бұл жоспарды жүзеге асыру үшін қажетті құжаттар дайындалып жатыр. Жасөспірімдер арасында бұқаралық спортты дамыту мақсатында балалар спорт кешенін ашу жоспарланған. Жиын соңында тұрғындар автобус қатынасы, жол мен газ және басқа да әлеуметтік мәселелерді ортаға салып, нақты жауап алды.
Целиноград ауданында ауыл шаруашылығын дамытудың зор мүмкіндігі бар
ЦЕЛИНОГРАД. Ауданда болған іссапар барысында облыс әкімі Ермек МАРЖЫҚПАЕВ алдымен Қабанбай батыр ауылына келіп есеп берді. Мәдениет үйіне аудан халқы көптеп жиналды. Бұл аудан Астана маңындағы біраз ауылдарды қамтиды.
Атқарылған жұмыс аз емес. Ауылдардың проблемасы әлі де жетіп артылатын сыңайлы. Мұны кездесуге келіп су, жол, жарық мәселелерін алға тартқан аудан тұрғындарының айтқан базыналарынан аңғаруға болады. Кезінде Астана енді уық тіккен жылдары тұрғындардың көпшілігі жекеменшікке өтіп кеткен, сегменттік құжаты жоқ жерлерді сатып алған. Ешқандай инфрақұрылым қарастырылмаған жерлерде үй салып, кейін жарық, суды талап ететіндер де аз емес. Бұл даму үдерісіне кері әсерін тигізбей қоймайды.
Дегенмен, өңір басшысы аудан халқының әрбір тұрғынына қамқорлық таныту керектігін баса айтты. Аудан үлкен әлеуетке ие, бірақ оны толық көлемде жүзеге асыра алмай отыр. Өткен жылдың көрсеткіштерімен салыстырғанда инвестиция азайған. Тұрғын үйді пайдалануға беру көрсеткіші төмен. Ауыл шаруашылығында да салаға серпін беретін тұс аз емес.
Ауданның инфрақұрылымын дамыту мәселесі басты назарда. Үш жыл ішінде жалпы сомасы 8 миллиард теңгеге 352 шақырым сумен жабдықтау желілері жөнделді. Тек 2022 жылы Ақмол ауылында жалпы құны 3,6 миллиард теңге болатын 9 жоба жүзеге асырылды, ұзындығы 14,5 шақырым жылу желілерін қайта құру жобасы аяқталды.
2022 жылы Қараөткел, Софиевка және Қоянды ауылдарында денсаулық сақтау нысандары пайдалануға берілді. Приречное ауылындағы медициналық пункт жөнделді. 250 төсек-орынға арналған көп бейінді стационарлық аурухана салу жоспарлануда. Жалпы, 2025 жылға дейін ауданның 16 елді мекенінде жаңа амбулаториялық-емханалық нысандар салынады. Бұл іс ауыл тұрғындарының медициналық қызметтерге қол жеткізуін едәуір жеңілдетеді.
Сондай-ақ, алдағы уақытта 8 ауылда 9 мектеп салу жоспарлануда.
2023 жылы ауданда тұрғын үй салуға 2,8 миллиард теңге бөлінді.
Қоянды ауылында ауылдық клуб ашылса, Қараөткел, Талапкер ауылдарында мәдениет мекемелерін салу үшін жобалық-сметалық құжат дайын. Ақмол ауылында дене шынықтыру-сауықтыру кешені, Қабанбай батыр ауылында инклюзивті фитнес орталығы ашылды. Биыл ауданның жол құрылысы саласын дамытуға 23 миллиард теңге бөлінді. Үш жыл ішінде 45 миллиард теңгеге 320 шақырым жергілікті жол салынып, жөнделді. 2023 жылы газ бұру жүйелерінің құрылысына республикалық бюджеттен 2,5 миллиард теңге бағытталды. Ағымдағы жылы Аққайың, Шұбар және Қоянды ауылдарында газ бұру желілерінің құрылысы жүргізілуде.
Кездесуге келген өңір тұрғындары мемлекеттік тілде білім беретін мектептердің аздығы, жайылым мәселесі, басқа да өзекті жайлар туралы айтып, өз мәселелерін көтерді. Өңір басшысы барлық сұрақтарға тиянақты жауап беріп, азаматтарды жеке мәселелері бойынша қабылдады. Қабанбай батыр ауылындағы білім ошақтарында болды. Сондай-ақ, Мәншүк Мәметова атындағы ауылында 1000 басқа арналған тауарлы-сүт фермасы құрылысының барысын бақылады. Атап өтерлігі, аталмыш жобаның жалпы құны 4,5 миллиард теңге. Пайдалануға беру 2024 жылдың 1 тоқсанына жоспарланған.
Ұлмекен ШАМЕНОВА,
«Арқа ажарының» өз тілшісі.
(Облыс әкімінің Қорғалжын, Аршалы, Ерейментау, Шортанды аудандарында өткізген халықпен кездесулері жайлы газетіміздің келесі санында жариялайтын боламыз).
