Есіл ауданының прокуратурасы мектепті күрделі жөндеубарысында атқарылмаған жұмыс актілеріне заңсыз қол қою және бюджет қаражатынан жалпы сомасы 27 миллион теңгеден астам артық ақы төлеу фактілерін анықтады.
Мердігер жасасқан келісім-шарт талаптарын бұзуының салдарынан мектеп шатырын жабу, терезесін орнату және тағы басқа да айтарлықтай жұмыс көлемі орындалмай қалған, соның салдарынан мектептің күрделі жөндеу жұмыстары белгіленген мерзімде аяқталмаған.
Осыған байланысты прокурорлық қадағалау шараларының нәтижесінде мердігер ұйым мемлекеттік сатып алудың жосықсыз қатысушысы болып танылды және тиісті құрылыс-монтаж жұмыстарын орындамағаны үшін оған 1 380 000 теңге көлемінде айыппұл салынып, ӘҚБтК-нің 312-бабының 2-бөлігі бойынша лицензиясынан айырыла отырып, әкімшілік жауапкершілікке тартылды. Сонымен бірге, осыған жол берген лауазымды тұлғалар да тәртіптік жауапкершіліксіз қалмады.
Прокуратура тарапынан қабылданған осындай шаралардың арқасында нысанда атқарылуы тиіс жұмыстар белсенді түрде қайта басталып, тиянақты жалғасын табуда.
Ақмола облыстық прокуратурасының баспасөз қызметі.
