Жуырда аудан орталығы Макинск қаласында жеке кәсіпкер Лилия Ларина Арт-студия ашты. Негізгі мақсаты – дәстүрлі және дәстүрлі емес сурет салу әдістерін қолдана отырып, балалар мен ересектердің шығармашылық әлеуетін дамыту.
Дәстүрлі емес сурет салу әдістеріне саусақпен, алақанмен, әртүрлі таңбалармен, монотип, сызғыш қағаз, жіппен бояу, шырақпен, көмірмен сурет салу, суға сурет салу (Эбру), нүктелік сурет (пуантолизм), матаға сурет салу, кляксография және тағы басқалары жатады.
–Қаламызда осындай бір студия ашамын деп көптен бері ойланып жүр едім. Өз күшіммен аштым, ешқайда жүгінген жоқпын. Бірінші білімім бойынша сызу, бейнелеу өнерінің мұғалімі, екіншіден суретші пейзажист болғандықтан, осы бағытта ашамын деп бел будым. Басында осы студияны ашатын орын, яғни, бүкіл қалада жарық, кең, ең бастысы, суы бар бөлме табу қиын болды. Бірақ, сәті түсіп, қажетті орын тауып, аштық қой. Қазіргі таңда біздің студияға ересек адамдар, әсіресе, әйел адамдар келеді, олар бос уақыттарын әртараптандыру, күнделікті тұрмыстық мәселелерден дем алу үшін келіп тұрады, – деді өз сөзінде АРТ-студия иесі Лилия Ларина.
Студияда негізінен 3 топ жұмыс істейді. Бірінші топ 3 жастан 6 жасқа дейінгі балалар, екінші топ 7 жастан 9 жасқа дейінгі балалар, үшінші топ он жастан асқан балалар. Сондай-ақ, әртүрлі бағытта балалар мен ересектерге арналған кескіндеме, абстракция, аффирмация жасау бойынша шеберлік сабақтары өткізіледі. Арт-терапия сурет салып отырған адамның эмоционалды көңіл-күйіне тыныштық, тұрақтылық беретін көрінеді.
Салтанат ДОСЕТОВА,
«Арқа ажарының» өз тілшісі.
