Жуырда Қазақстан халқы Ақмола ассамблеясы жанындағы этномәдени орталықтар мен бірлестіктер әрбір үш жыл сайын ұйымдастырылатын аккредиттеу рәсімінен өтіп, алдағы уақытқа өз жұмыс жоспарларын айқындады.
Қазақстан халқы Ақмола ассамблеясы хатшылығының меңгерушісі Сабырхан Кенжебаевтың мәлімдеуінше, этномәдени бірлестіктер әрбір үш жыл сайын қоғамдық аккредиттеуден өтулері тиіс. Қоғамдық аккредиттеу ережелері барлық ұсыныстар мен ескертулерді ескере отырып әзірленеді екен. Аттестациядан өткен бірлестіктер Ақмола ассамблеясының этномәдени бірлестіктері деп аталады. Оған жұмысты бастағандарына бір жыл толмаған бірлестіктер қатыса алмайды.
Қоғамдық аккредиттеу – этномәдени бірлестіктер, олардың филиалдары және құрылымдық бөлімшелерінің қызмет ету деңгейінің «Қазақстан халқы Ассаблеясы туралы» Қазақстан Республикасы заңының белгілі бір өлшемдері мен талаптарына сәйкестігін айқындайды. Жалпы, көп этносты, көп мәдениетті мемлекетіміздің өркендеп дамуы жағдайында этносаралық бірлік пен келісім аса маңызды құндылық болып табылады. Этносаралық және конфессияаралық келісімнің қазақстандық моделі белсенді түрде Қазақстанның тұрақты даму факторы ретінде қарастырылуда.
Біздің қазақ ұлты мен диаспоралар арасындағы байланыс ұлттық теңдік, ынтымақтастық, азаматтық жауапкершілік қағидаларына негізделеді. Ұлт саясатының негізгі бағыттары этносаралық ахуалды талдап, саралау, қауіп-қатердің алдын-алу әлеуметтік-рухани өмірдің маңызды тұстарын қадағалаудан тұрады. Этносаралық қақтығыстар мен келіспеушіліктерді туындататын себептер де алуан түрлі. Осындай жанжалдардың алдын алуда этномәдени орталықтардың атқаратын қызметі ерекше.
Ендеше, ел аумағында, оның ішінде біздің өңірде жұмыс істеп жатқан этномәдени бірлестіктер Қазақстан халқы Ассамблеясының өзегі болып табылады. Қоғамдық ұйымдар есебіндегі бұл бірлестіктер этностардың тарихын, ана тілін, ауызша және жазба әдебиетін, ұлттық өнерін, әдет-ғұрып, салт-дәстүрлерін сақтау мен дамыту жұмыстарын жүргізеді.
Сөйтіп, жуырда «Достық» үйінде Ақмола облысы ішкі саясат басқармасы басшысының орынбасары, Қазақстан халқы Ақмола ассамблеясы хатшылығының меңгерушісі С.М.Кенжебаевтың төрағалығымен Ақмола облысының этномәдени бірлестіктерін аккредиттеу жөніндегі облыстық комиссияның отырысы өтіп, онда қоғамдық аккредиттеуге құжаттарын тапсырған этномәдени бірлестіктің құжаттары қаралып, зерттелді. Нәтижесінде құжат тапсырған барлық этномәдени бірлестіктер қайта аккредиттелді. Қазақстан халқы Ақмола ассамблеясының хатшылығы екі жұмыс күні ішінде Қазақстан Республикасының Ақпарат және қоғамдық даму министрлігі жанындағы «Қоғамдық келісім» мекемесіне этномәдени бірлестіктердің қоғамдық аккредиттелуі жөніндегі облыстық комиссияның шешімін жолдады. Аккредиттеу комиссиясының жұмысына Ақмола облысы ішкі саясат басқармасы басшысының орынбасары, Қазақстан халқы Ақмола Ассамблеясы хатшылығының меңгерушісі – С.М.Кенжебаев төрағалық етті. Сөйтіп, Ақмола облыстық «Қазақ тілі мен мәдениеті», «Ақмола облысының орыс қауымы», «Ақмола облыстық «Видергебурт» немістер қоғамы», «Манас» этномәдени орталығы» секілді бас-аяғы 17 қоғамдық бірлестік алдағы үш жылға аттестаттаудан өтті.
Жуырда «Қоғамдық келісім» мекемесінің басшысы Қуаныш Шақшақов Қазақстан халқы Ақмола ассамблеясының этномәдени бірлестіктерінің төрағаларымен кездесіп, оларды сәтті өткен аккредиттеумен құттықтады. Бұдан басқа, олар Қазақстан халқы Ақмола ассамблеясының этномәдени бірлестіктерінің қызметіне қатысты маңызды мәселелер, биылғы жылға арналған жоспарларды талқылады. Нақтылай айтқанда, этномәдени бірлестіктер 1 наурыз – Алғыс айту күні, Наурыз мейрамы, 1 мамыр – Қазақстан халқының бірлігі күні сияқты алдағы маңызды іс-шараларды өткізу бойынша өз ұсыныстарын енгізді. Сонымен бірге, бұл отырыста Қазақстан халқы Ассамблеясының 30 жылдығын және Ұлы Отан соғысының аяқталғанына 80 жыл толуын мерекелеу жоспарларына да ерекше назар аударылды.
–Көпұлтты өңірде этномәдени бірлестіктердің жұмыс істеуі қажет-ақ. Мәселен, біздің өзбек, басқа да ұлт өкілдерін алатын болсақ, олардың тілі мен дінін, салт-дәстүрін сақтап, насихаттауда осындай орталықтар мен бірлестіктер көмегін тигізеді, – дейді «Ақмола облысының өзбек этномәдени орталығы» қоғамдық бірлестігінің төрайымы Тажибуви Медетова.
Аккредиттеуден өткен барлық этномәдени бірлестіктер биыл Қазақстан халқы Ассамблеясының құрылғанына 30 жыл толуы аясындағы мерейлі жылы бірқатар жаңа міндеттер мен бастамаларды қолға алмақшы.
Ы.ШАМШИЕВА.
сурет: rus.azattyq-ruhy.kz
4 Total Views , 1 Views Today
