Жаныңда жүр жақсы адам
Адам баласының көпшілік арасында бағалануы тікелей оның адамгершілік қасиеттеріне байланысты. Міне, осындай құрметке ие болып жүрген тұлғалардың бірі – Ш.Уәлиханов атындағы Көкшетау университеті жанындағы көпсалалы колледжінің директоры Рыспай Уаисов тұрғысында әңгіме өрбіткенді жөн көрдік.
Бүгінде өзінің туған жері мен қызмет істеп жүрген ортасына сыйлы жан Рыспай Базарбайұлы 1975 жылы 4 сәуірде Солтүстік Қазақстан облысы (бұрынғы Көкшетау облысы), Қызылту ауданы, Бидайық ауылында дүниеге келген. Әкесі Базарбай Уаисұлы мен анасы Майна Кәрібайқызындай қарапайым жұмысшы отбасында ата-ананың мейіріміне қанып, ізгілік пен адамгершілікке тәрбиеленген бес перзенттерінің бірі болған. Бауырлары да өмірден өз орындарын тапқан жоғары білімді азаматтар.
Бидайық орта мектебін бітіріп, Мортық орта мектебінде алғашқы еңбек жолын бастаған Рыспай Базарбайұлы 1993-1994 жылдар аралығында Қазақстан Республикасы Қарулы Күштері қатарында Отан алдындағы борышын өтейді. Одан кейін Ш.Уәлиханов атындағы Көкшетау мемлекеттік университетінде «Бейнелеу өнері және сызу» мамандығы бойынша білім алған ол, 2003 жылға дейін Бидайық орта мектебінде бейнелеу өнері және сызу пәнінің мұғалімі қызметін жалғастырады. Әркез өзінің айналасындағыларға жақсылық жасап жүретін ақжарқын мінезімен, кез-келген іске тыңғылықты қарайтын қасиеттерімен ұжым арасында қызмет ету барысында кәсіподақ комитетінің төрағасы және ұйымдастырушысы қызметтерін қосымша атқарады. Одан әрі 2003 жылы отбасымен Көкшетау қаласына қоныс аударғаннан кейін, аталмыш университет жанындағы көпсалалы колледжде оқытушы болып қызметін жалғастырады. Сөйтіп, университеттің бейнелеу өнері кафедрасының оқытушысы, факультет деканының оқу-тәрбие жұмысы жөніндегі орынбасары болып еңбек еткен. 2007-2010 жылдар аралығында университеттің білім беру сапасын мониторингілеу бөлімінің басшысы, 2010-2014 жылдары аралығында университет жанындағы көпсалалы колледждің директоры болады. Ал, 2014 жылдан 2016 жылға дейін жоғары оқу орнына дейінгі дайындық бөлімінің басшысы бола жүріп, Ш.Уәлиханов атындағы КМУ-дің қабылдау комиссиясының жауапты хатшысы қызметтерін қатар атқарады.
«Жақсының жақсылығын айт, нұры тасысын» демекші, Көкшетау гуманитарлық-техникалық академиясында «Экономика» мамандығы бойынша магистратураны аяқтап, 30 жылдан астам уақыт бойы шәкірт тәрбиелеп келе жатқан ол экономика және бизнес ғылымдарының магистрі академиялық дәрежесіне ие болған.
Омбы өңіріне қарасты Есенгелді елді мекенінің тумасы, Кәрібай нағашы атасы мен Дәрібай Жетекеевтердің ұстаздық жолын жалғастырып жүрген Рыспай Базарбайұлы 2016 жылдан бастап бүгінгі күнге дейін Ш.Уәлиханов атындағы Көкшетау университеті жанындағы көпсалалы колледжінің директоры қызметін абыроймен атқарып жүрген білікті басшы. Ол халықаралық, республикалық және облыстық ғылыми-практикалық конференциялардың қатысушысы, орта арнаулы және жоғары оқу орындарына арналған әдістемелік құралдардың авторы.
Қазақстан Республикасы Білім және ғылым министрлігі делегациясының құрамында Тәжікстан, Қырғызстан, Түркіменстан, Ресей сынды жақын шетелдерде Қазақстанның жоғары оқу орындарының білім беру саласы тақырыбында ұйымдастырылған көрмелерге қатысып, тәжірибе жинақтаған. Сондай-ақ, ЖОО-ға дейінгі оқыту жөніндегі республикалық оқу-әдістемелік кеңестің мүшесі.
Әріптестері Рыспай Базарбайұлы туралы айтқанда, «ортамызда сабырлы да салмақты мінезінен танбайтын кең жүректі азамат әрі кез-келген шаруаның ебін тауып, өз ісіне жауапкершілікпен қарайтын тұлға» деп бағалайды. Өйткені, ол басшылық еткен жылдардан бері көпсалалы колледж айтарлықтай нәтижелерге қол жеткізген. Оқытушылары бірнеше рет «Үздік педагог» атақтарының иегерлері, «Педагогикалық инновациялар витринасы» республикалық байқауының және басқа да беделді шаралардың жеңімпаздары атанған. Ал, колледж студенттері болса, халықаралық байқаулардың, пәндік олимпиадалардың және WorldSkills чемпионаттарының жүлдегерлері бола отырып, жоғары нәтижелер көрсетуде.
Рыспай Уаисов «Аманат» партиясының мүшесі және «Шоқан» бастауыш партия ұйымының төрағасы болған. Ол өзінің білім беруді дамытуға қосқан үлесі үшін «Білім беру саласының үздігі» төсбелгісімен, «Университеттің дамуына қосқан үлесі үшін» мерейтойлық медалімен, I дәрежелі «Университеттің білім және ғылымды дамытуға қосқан ерекше үлесі үшін» құрмет белгісімен марапатталған. «Білім және ғылым қызметкерлерінің кәсіподақтарын дамытуға қосқан үлесі үшін» және «Белсенді қызметі үшін» төсбелгілерінің де иегері. Сондай-ақ, Көкшетау қалалық білім бөлімінің, облыстық білім басқармасының, «Өрлеу» педагог қызметкерлердің біліктілігін арттыру институтының грамоталары, Қазақстан Республикасы Білім және ғылым министрлігінің Құрмет грамотасы, Қазақстан Республикасы Президентінің Алғыс хаты, «Аманат» партиясының Алғыс хаты және Ақмола облысы әкімінің Алғыс хатымен марапатталған.
Рыспай Базарбайұлы өзінің кәсіби қызметін өскелең ұрпаққа білім мен тәрбие беруді одан әрі дамыту мақсатында жалғастырып келеді. «Еңбек – ердің айнасы», «Еңбегімен ел таныр» деген тәмсіл Рыспай Базарбайұлы секілді азаматтарға қарата айтылғандай. Иә, «Адам еңбегімен бағалы» деген сөз осындайдан шықса керек.
Бүгінде жұбайы Салтанат Қайроллақызы екеуі Дархан, Әділхан есімді қос ұлдары мен Райяна есімді қыздарын тәрбиелеп отырған ұлағатты отбасы. Қашанда жанашырлығымен, адамгершілігімен танылып, өз ортасында сыйластық пен беделдің биігіне көтерілген Рыспай Базарбайұлының еңбекпен өрілген өмірі осылай жалғасып келеді.
Асылай ҚАДЫРҚЫЗЫ,
«Арқа ажарының» өз тілшісі.
Суретте: Ш.Уәлиханов атындағы Көкшетау университеті жанындағы көпсалалы колледжінің директоры Рыспай Уаисов.
5 Total Views , 1 Views Today
