Агроөнеркәсіптік кешеннің жоғары жетістіктері басшылар мен мамандардың, аграршы ғалымдардың және малшы, механизаторлардың күнделікті еңбегімен құрылатыны бәрімізге белгілі.
Кәсіби мереке қарсаңында мемлекеттік наградаларға ұсынылатын сала қызметкерлері бар. Олар – жай маман ғана емес, өз ісінің майталмандары, кәсібилігімен қатар, ұйымдастырушылық қабілетімен, жауапкершілігімен ерекшеленетін жандар.
Осындай еңбек ерлерінің бірі – Ақкөл ауданының мақтанышы Саян Тілеуұлы Исенов. Жуырда Республика күні мерекесінде ол еліміздің еңбек адамына берілетін ең мәртебелі марапаттардың бірі – III дәрежелі «Еңбек Даңқы» орденінің иегері атанды. Бұл марапат Саян ағамыздың жиырма жылдан астам уақыт бойы «Хлебороб» жауапкершілігі шектеулі серіктестігіндегі қажырлы еңбегінің заңды жемісі.
Әке жолын қуған азамат немесе кәсіпке деген адалдық қайдан пайда болғанын айта кету керек. Саян Исеновт3ң өз кәсіби жолын таңдауы терең тамырға ие. Ол – ауыл шаруашылығы саласында абыройлы еңбек еткен әулеттің жалғастырушысы. Оның әкесі де кезінде ауыл шаруашылығы саласының білікті маманы, инженер болған. Саян бала күнінен бастап әкесінің өз мамандығына деген адалдығын көріп өсті. Ол ауылдың табиғи ортасында, малдың ішінде, жердің иісін сезініп тәрбиеленді. Мал ұстау, оның жем-азығын дайындау, күтіп-баптап өсіру – ол үшін тек жұмыс емес, күнделікті әдетке және жанына жақын іске айналды.
Бұл отбасылық дәстүр мен бала кезгі талпыныс Саянның кәсіби таңдауын да айқындады. Ол 2001 жылы еңбек жолын бастағанда-ақ, белгілі болған. Өз ісін сүйіп, оның қыр-сырын меңгеруге деген ықыласының арқасында қарапайым жұмысшыдан білікті зоотехник деңгейіне дейін көтерілді.
Саян Тілеуұлы еңбек ететін «Хлебороб» жауапкершілігі шектеулі серіктестігі – Ақкөл ауданының Наумов ауылдық округінде орналасқан, аймақтың ірі аграрлық кәсіпорындарының бірі. Бұл серіктестік тек егін шаруашылығымен ғана емес, сонымен қатар мал шаруашылығын да дамытуға зор көңіл бөледі. Мұндағы басты бағыттардың бірі – мал басын өсіру, олардың тұқымын жақсарту және жоғары өнім алу. Кәсіпорынның тұрақты дамуы және қаржылық көрсеткіштерінің жақсаруы – мұндағы әрбір қызметкердің, әсіресе, Саян Исенов сияқты жетекші мамандардың тікелей еңбегінің нәтижесі. 2001 жылдан осы шаруашылықта жұмыс істеп келе жатқан Саян ағамыз 2018 жылдан бастап зоотехник лауазымын атқаруда. Оның 21 жылдық еңбек өтілі – «Хлебороб» шаруа қожалығының тарихымен тығыз байланысты. Ол осы жылдар ішінде ауыл шаруашылығындағы көптеген өзгерістерге, дағдарыстарға және жаңа технологиялық кезеңдерге куә болды.
Зоотехник – терең ғылыми білімді және практикалық тәжірибені қажет ететін күрделі мамандық. Саян Тілеуұлының мал шаруашылығының барлық процестерін басқаруды қамтитын жұмыстарын айта кетейік. Бірінші кезекте, мал басының генетикалық сапасын жақсарту, ең өнімді тұқымдарды таңдау және будандастыру жоспарын құру. Бұл жылдарды талап ететін, болашаққа бағытталған ең маңызды міндет. Келесі ретте, әр мал тобына арнайы жем, шөп рационын дайындау кіреді. Бұл рациондар малдың денсаулығын сақтап, сүт пен ет өнімділігін арттырады. Малды ұстаудың санитарлық-гигиеналық нормаларын қадағалау, аурулардың алдын алу және мал дәрігерімен тығыз жұмыс істеу де маңызды. Сонымен қатар, шаруашылықтың бекітілген жылдық және тоқсандық өндірістік жоспарларын жасап, орындалуын қадағалау керек.
Саян ағамыздың бұл саладағы жетістігі – оның тек теорияны біліп қана қоймай, оны сол Ақкөл ауданының жергілікті климаттық және табиғи жағдайларына бейімдей алуында. Оның біліктілігінің арқасында «Хлебороб» жауапкершілігі шектеулі серіктестігі мал шаруашылығы саласының көрсеткіштері жыл сайын тұрақты өсуде. Бүгінде 44 жасқа толып отырған Саян Исенов өз ғұмырының тең жартысынан астамын, нақтырақ айтқанда 21 жылын, бір ғана щаруашылыққа арнады. Бұл тек жұмыс орнына деген адалдықты ғана емес, еңбекке, өзі таңдаған кәсіпке деген шегі жоқ құрметті көрсетеді.
Жаһанда экономикалық тұрақсыздық, жұмыс орындарының жиі ауысуы мен мамандықтардың тез ескіруі үстемдік етіп жатқанда, Саян Тілеуұлының осы тұрақтылығы жастар үшін тамаша үлгі. Нағыз білікті мамандар ғана экономиканың қозғаушы күші бола алады. Ол – өзгеріске төтеп беріп, жаңа технологияларды үйреніп, өндірістің сапасын үнемі жақсартуға ұмтылған нағыз кәсіпқой.
Саян Исеновтің марапатталуы – жеке тұлғаның жетістігі ғана емес, Қазақстан үшін ауыл шаруашылығы саласының стратегиялық маңыздылығын тағы да бір рет дәлелдейтін оқиға. Ауыл шаруашылығы – ұлттық азық-түлік қауіпсіздігінің тірегі. Ел халқын сапалы және экологиялық таза өнімдермен қамтамасыз ету – бұл Саян ағамыз сияқты еңбеккерлердің күнделікті миссиясы. Олардың қолымен өсірілген астық пен мал – еліміздің әл-ауқатының кепілі. Ауылды көтеру, оның әлеуетін арттыру – бүгінгі Қазақстанның, соның ішінде біздің Ақмола облысының басты мақсаттарының бірі.
III дәрежелі «Еңбек Даңқы» ордені – Қазақстан Республикасында еңбек саласындағы ерекше жетістіктер үшін берілетін аса құрметті марапат. Бұл орден – адамның өз кәсібіне деген адалдығын, көп жылдық қажырлы еңбегін және саланың дамуына қосқан айрықша үлесін көрсетеді. Саян Тілеуұлының осы орденді алуы – оның жұмысының, дәлірек айтсақ өз ісіне тиянақтылығының елеусіз қалмағанын білдіреді. Бұл – мемлекеттік деңгейдегі еңбек ұжымына, марапатталушының ауылына және бүкіл Ақмола облысының аграрлық секторына деген құрмет.
Саян ағамыз өзінің жинақтаған тәжірибесін жас әріптестерімен бөлісуді үнемі жалғастырып келеді. Ол – тек жұмыс берушінің талаптарын орындаушы ғана емес, жас мамандарды тәрбиелеуші тәлімгер. Оның айтуынша, қазіргі ауыл шаруашылығы – бұл тек қол еңбегі емес, цифрлық технологиялармен, жаңа селекциялық әдістермен жұмыс істейтін ғылыми сала. Еңбекқор азаматтың арманы – Қазақстанның мал шаруашылығын әлемдік стандарттарға сай дамытып, экспорттық әлеуетін арттыруға атсалысу.
Біз осындай қажырлы еңбек иесіне зор денсаулық, отбасылық бақыт және кәсіби жетістіктер тілейміз! Ол сияқты азаматтардың еңбегі арқасында біздің еліміздің ертеңі жарқын болары сөзсіз.
Бейбарыс ШАЛАБАЕВ,
«Арқа ажарының» өз тілшісі.
