Елжас Исенов пен Бақытжан Исенова 55 жылдық отбасылық өмір белесін бірге еңсеріп келеді. Дауыс беру күні ерлі-зайыптылар Қызыл Жар ауылындағы №2 сайлау учаскесіне ондаған жыл бойы қалыптасқан дәстүр бойынша бірге келіп, өз таңдауларын жасады, деп хабарлайды Өңірлік Коммуникациялар қызметінен.
Исеновтер үшін бүгінгі күн – ұзақ жылдарға созылған отбасылық тарихтағы тағы бір ортақ оқиға. Олар 55 жыл бойы өмірдің талай белесін бірге өткеріп, берік отбасы құрды. Осы уақыт ішінде өзара құрмет пен қолдауды сақтап, қандай жағдайда да бір-бірінің жанынан табыла білді.
Сексен жастағы Бақытжан Молдабаевна жұбайымен бірге сайлау учаскесіне келіп, дауыс беруге қатысты. Бұл олар үшін алғашқы сайлау емес. Дегенмен әр сайлау күнін ерлі-зайыптылар әдеттегідей бірге қарсы алып келеді.
«55 жыл ішінде бірге талай нәрсені бастан өткердік. Қуанышты да, қиындықты да бірге көрдік. Ең бастысы – әрдайым бір-бірімізге қолдау көрсеттік. Бүгін де бірге келдік. Ел өміріне қатысуға мүмкіндік бар кезде оны пайдалану керек деп есептейміз. Балаларымыз, немерелеріміз бен шөберелеріміз бейбітшілік пен берекеде өмір сүрсе екен дейміз», – деді ерлі-зайыптылар.
Исеновтер отбасының тарихы – тек отбасылық беріктіктің ғана емес, ұрпақтар сабақтастығының да үлгісі. Жылдар бойы ел өзгеріп, балалары өсіп, немерелері дүниеге келді. Ал отбасы мен қоғам үшін маңызды оқиғаларға бірге қатысу дәстүрі өзгеріссіз қалды.
Бүгін ерлі-зайыптылар тағы да өз таңдауын бірге жасады. Олардың 55 жылдық отбасылық жолы – сенім, өзара құрмет және әрдайым қатар жүрудің жарқын үлгісі.
Дереккөз: aqmolacom.kz
