Келер жылы Степногорск қаласындағы «Сопка – 305» су қоймасындағы су тазалау нысандарын жаңғырту жұмыстарын аяқтау жоспарланып отыр.
Облыстық энергетика және тұрғын үй-коммуналдық шаруашылығы басқармасының мәліметінше, қазіргі кезде нысанның дайындығы 90 пайыз. Су қоймасындағы кіре беріс бақылау, жылу бекетінің ғимараттары, су сору және сүзгі стансаларында монтаждау жұмыстары аяқталды. Бұдан бөлек, технологиялық жабдықтарды орнату, электрмен жабдықтау желісін орналастыру және су резер-вуарына техникалық қызмет көрсету жұмыстары да аяқталуға жақын. «Нұрлы жол» бағдарламасы бойынша қолға алынған жобаның құны шамамен 5,6 миллиард теңгені құрайды.
– Аталмыш жоба инновациялығымен ерекшеленеді. Қазіргі заманғы технологияны енгізу арқылы қала тұрғындары пайдаланатын ауыз судың сапасы жақсара түседі, – дейді басқарманың құрылыс, су жіберу және сумен жабдықтау нысандарын пайдалану бөлімінің басшысы Нұржан Бостан.
Жобаны жүзеге асыру жұмыстары облыс әкімдігі мен облыстық энергетика және тұрғын үй-коммуналдық шаруашылығы басқармасының жіті бақылауында.
«Арқа ажарының» өз ақпараты.
Степногорск қаласы.
