Қазақстан Республикасының Қасым-Жомарт Тоқаевтың «Егемен Қазақстан» газетіндегі «Тәуелсіздік бәрінен қымбат» мақаласындағы мемлекеттік тіл туралы айтқан ойлары ел көңілінен шықты деп есептеймін.
«Мемлекеттік тілді білу – Қазақстанның əрбір азаматының парызы. Міндеті деп те айтуға болады. Осы орайда мен барша қазақстандықтарға, оның ішінде қазақ тілін əлі жете меңгермеген отандастарыма үндеу тастағым келеді. Жастар ағылшын тілін немесе басқа да тілдерді аз ғана уақытта меңгере алатынын көріп отырмыз. Тұтас буын алмасқан осы жылдарда қазақ тілін үйренгісі келген адам оны əлдеқашан біліп шығар еді. Халқымызда «Ештен кеш жақсы» деген сөз бар. Ең бастысы, ынта болуы керек» – деді Президент.
Иә, рас, қазақ тілінде сөйлеу сәнге айналатын уақыт жетті. Қасиетті қазақ тілінің мәртебесін көтеріп, одан әрі дамыту әр азаматтың міндеті. Осы орайда, әрбір мекеме басшысы өзі үлгі көрсетіп, қызметкерлерінен қазақ тілінде сөйлеуді, құжаттарының мемлекеттік тілде жүргізілуін талап етсе, қазақ тілінің мәртебесін өркендетуге қосқан үлес болатыны сөзсіз.
Мемлекеттік тіл мәселесі үлкенді-кішілі жиындарда тек мінбеден ғана айтылып қана қоймай, күнделікті өмірде нақты істермен көрініс табуы тиіс.
Тіл – халықтың жүрегі, ұлттық болмысы, ұлттық рухы, дәстүрі мен салты. Сондықтан әр халық өз тілінде сөйлеп қана қоймай, оны дамытуға күш қуатын жұмсауы керек.
Мемлекеттік тілдің мәртебесін асқақтату – Қазақстан Республикасының әрбір азаматының азаматтық парызы. Осы қасиетті парызға әрбір азамат адал болса екен!
Шаттық ҚАРАСАРТОВА,
М.Ғабдуллин атындағы № 3 көптілде
оқытатын мамандандырылған
гимназиясының мұғалімі.
