Көкшетау қаласының зағип және нашар көретін азаматтарға арналған арнаулы қалалық кітапханасында көпбалалы Әкімбаевтар отбасымен «Шапағаты мол шаңырақ» атты кездесу кеші ұйымдастырылды.
Елбасы Нұрсұлтан Назарбаев «Отбасы – Қазақстан қоғамының діңгегі, экономикадағы, мәдениеттегі, әлеуметтік саясаттағы барлық жаңа жетістіктерінің негізі» деген еді. Бүгінде «Отбасы күні» осы ұлағатты мұраларымызды нығайтып, жұбайлық өмірдің жауапкершілігі мен балаларға, аға буынға ұдайы қамқор болудың маңыздылығын жастардың жадына сіңіре беруге зор үлесін қосып келеді.
Тәрбиелік мәні зор іс-шараға Ақмола облысының «Мүгедектер қоғамының» және Бұланды ауданының Қазақ зағиптар қоғамы бастауыш ұйымының төрағасы Серік Әкімбаев пен оның балалары, «Ақниет» мүгедектер қоғамдық бірлестігінің төрайымы Қымбат Досмағанбетова, Ақмола облысының іскер әйелдер қауымдастығының төрайымы Дәмелі Қойшина, «Шаңырақ» қоғамының өкілдері, облыстық зағиптар қоғамының жанындағы оқу-өндірістік кәсіпорнының директоры Батырхан Ахметов және кітапхананың оқырмандары қатысты. Оларға қалалық ақпараттық кітапхана жүйесі дайындаған отбасы тақырыбындағы бейнефильм ұсынылды. «Гармония» көркем-эстетикалық клубының мүшелері, кітапхананың тұрақты оқырмандары Светлана Оладько, Лидия Генза, Андрей Михель облыстық филармонияның музыканты Әлібек Ахмалишевтің сүйемелдеуімен жиналған қауымға ән шашуын ұсынды.
Отбасының негізі, шаңырақтың киелілігі, үй болудың қыр-сыры, жанұядағы тәлім-тәрбиенің мән-маңызы туралы әңгіме өрбіген аталмыш кездесуде отбасылық дәстүрлер мен құндылықтар жайында да кеңінен сөз қозғалды.
Кеш соңында Әкімбаевтар отбасы «Мерейлі отбасы – 2016» республикалық байқауының қатысушылары екендігі айтылып, ұйымдастырушылар оларға сәттілік тіледі.
«Арқа ажарының» өз ақпараты.
