ПРЕЗИДЕНТ БАСТАМАЛАРЫ
Жастарымыз бен жасөспірімдеріміздің бойында, ең алдымен, рухани құндылықтарды молайтуға және нығайтуға бүкіл қоғам болып атсалысуымыз керек. Оны бойға сіңіру, қабылдап, басқаларға жұғысты етудің жолдары көп.
Бұл турлы өзінің Жолдауында, сөйлеген сөздерінде Мемлекет басшысы Қасым-Жомарт Тоқаев ұдайы айтып келеді, Үкіметке, тиісті министрліктерге тапсырмалар да беріп отырады.
Мұндайда еліміздің және шет елдердің айтулы тұлғаларынан алатын өнеге, тағылымымыз да өз пайдасын бермей қоймайтындығы сөзсіз. Мәселен, жуырда көрікті Бурабай аймағына әлемдік бокс тарихындағы даңқты спортшылардың бірі, аты аңызға айналған Рой Джонс кіші арнайы сапармен келді. Атақты чемпионның бұл сапары жас боксшылар, жаттықтырушылар және жалпы, өңір тұрғындары арасында ерекше қызығушылық тудырды. Онымен бірге Ақмола облысына Олимпиада чемпионы, ҚР Парламенті Мәжілісінің депутаты Серік Сәпиев және қазақ кәсіпқой боксының танымал өкілі Нұржан Кәрімжанов сынды тұлғалар да келді.
Рой Джонс кіші – әлемдік бокстың барлық уақыттағы ұлы тұлғаларының бірі ретінде танылған америкалық кәсіпқой боксшы. Оның ерекшелігі – ол орта салмақтан бастап ауыр салмаққа дейінгі төрт түрлі салмақ дәрежесінде әлем чемпионы атанған жалғыз спортшы. Сондай-ақ, 1988 жылғы Олимпиада ойындарының күміс жүлдегері, WBC, WBA, IBF және IBO нұсқалары бойынша көптеген титулдардың иегері. Ұзақ жылдар бойы Джонс салмақ дәрежесіне қарамастан, әлемнің ең үздік боксшысы болып саналды. Оның қайталанбас стилі, керемет жылдамдығы, реакциясы және айқасты тартымды жүргізу мәнері оны әлемдік спорттың культтік тұлғасына айналдырды, оның есімі Халықаралық бокс Даңқ залына енгізілген.
Сапар бағдарламасы Щучинскіде жақында ашылған жаңа, көпфункционалды Спорт сарайын аралаудан басталды. Қонақтарға заманауи жаттығу залдары, бокс рингтері, функционалдық дайындық аймақтары және бұқаралық спортқа да, кәсіпқойларды дайындауға да арналған инфрақұрылым таныстырылды. Рой Джонс кешеннің жабдықталуын жоғары бағалап, мұндай спорт базалары болашақ чемпиондарды тәрбиелеу үшін тамаша жағдай жасайтынын баса айтты.
Өз кезегінде Серік Сәпиев аймақтарда мұндай нысандарды дамыту боксты насихаттауда және балаларды тұрақты жаттығуларға тартуда шешуші рөл атқаратынын жеткізді. – Жасөспірімдерде жағдай, жаттықтырушылар және қолдау болса, сонда ғана нәтиже пайда болады,– дейді ол.
Ақмола облысы әкімінің орынбасары Досұлан Айтбаев:
– Біз осы көпфункционалды спорт сарайын ашқанымызға небәрі екі апта болды. Сол кезде облыс басшысы Марат Ахметжанов оның қабырғасында ауқымды спорттық іс-шаралар, әлемдік деңгейдегі спорт жұлдыздарымен кездесулер өтетінін уәде еткен еді. Бүгін бізде асыра сілтеусіз айтқанда, әлемдік бокс аңыздары қонақта және бұл тек бастамасы ғана, – деп пікір білдірді.
Ең жылы әрі маңызды сәт Бурабай ауданының жас боксшыларымен және спорт мектептерінің тәрбиеленушілерімен өткен кездесу болды. Зал лық толы болды, ал әлемдік бокс жұлдыздарын көру және олардың кеңестерін тікелей тыңдау мүмкіндігі балалар үшін үлкен шабыт көзіне айналды. Спортшылар бокстағы алғашқы қадамдары, барлық кәсіпқойлар басынан өткізетін қиындықтар және шыңға апаратын жол әрдайым тәртіптен, табандылықтан және күнделікті жұмыстан басталатыны туралы айтып берді.
Шеберлік сағаты кезінде Рой Джонс өзінің жеке техникасының элементтерін, соның ішінде оған әлемдік деңгейде көптеген жеңіс әкелген аты аңызға айналған бүйірден соққысын және корпусты басқару мәнерін көрсетті. Серік Сәпиев пен Нұржан Кәрімжанов та халықаралық ареналардағы жеке тәжірибелерімен бөлісіп, психологиялық тұрақтылықтың, жанқиярлықтың және рингте де, одан тыс жерде де қиындықтарды жеңе білудің маңыздылығын атап өтті.
Әлемдік жұлдыздардың бұл сапары Бурабай ауданы үшін айтулы оқиға болып, жас спортшыларға қуатты серпін сыйлады. Чемпиондармен кездесу балаларға үлкен жеңістер дәл осы жерден – спорт мектептерінің секцияларында, күнделікті жаттығулардан, өзіңмен жұмыс істей білуден және кешегіден жақсы болуға ұмтылудан басталатынын көрсетті.
Бейбарыс ШАЛАБАЕВ,
“Арқа ажарының” өз тілшісі.
