Әлеуметтік салаға жете көңіл бөлінеді

Сандықтау ауданының әкімі Асылбек Исмағамбетов тұрғындар алдында берген есебінде өңірдің әлеуметтік-экономикалық дамуының бірқатар жетістіктерін атап көрсетіп, биылғы жылғы жоспарланған жұмыстарға да тоқталды. Есеп беру кездесуіне Қазақстан Республикасы Президенті Әкімшілігінің мемлекеттік инспекторы Қалдыбек Бәйімбетов қатысты.

Аудан басшысы өз есебінде Мемлекет басшысының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауы халықтың өмір сүру деңгейін одан әрі жақсартуға бағытталғанын, бұл еліміздегі әрбір адамға деген қамқорлық екенін атап өтті.
– Өткен жылы аудан белгілі нәтижелерге қол жеткізді. Ауданның одан әрі әлеуметтік-экономикалық дамуына және рухани жаңғыруына барлық жағдай жасадық. Жұмыс қорытындысының нәтижесінде 2019 жылдың нақты міндеттерін анықтап, оны жүзеге асырамыз. Жыл басынан бері 14 ауылдық округтің тұрғындары алдында есептік кездесу өткіздім. Онда 25 мәселе көтеріліп, ұсыныстар айтылды. Мәселелерге түсінік беріліп, оларды орындау үшін шаралар қабылданды. Біздің аудан үшін негізгі басымдық аграрлық секторды, шағын және орта бизнесті дамыту болып табылады,–деген аудан әкімі өткен жылы 28,7 миллиард теңгенің ауыл шаруашылығы өнімі өндірілгенін, 2,9 миллиард теңгенің өнеркәсіп тауарлары шығарылғанын, негізгі капиталға 6,3 миллиард теңге инвестиция тартылғанын атап өтті. Өткен жылы 309,9 мың гектар алқапқа себілген 558,3 мың тонна дәнді және бұршақ дақылдары шашпай-төкпей жинап алынған. Гектар берекесі 19,5 центнерден айналыпты. «Максимовский» серіктестігі гектарынан 26 центнерден, «ПЗ Балкашинский» серіктестігі гектарынан 25,4 центнерден астық жинаған. Егіншілікті дамытуға мемлекет тарапынан 865 миллион теңге берілді. 57 ауыл шаруашылығы техникасы сатып алынды.
2018 жылы 5 миллиард 800 мың теңгенің мал шаруашылығы өнімдері өндірілген. Соңғы жылдары ауданда мал басы көбейген. Мәселен, ірі қара малдың саны 20,5 мың басты, қой мен ешкі 14,8 мыңды, шошқа 5,6 мыңды, үй құстары 70,7 мыңды құрапты. Ірі қара малды асылдандыру үшін 29 ауыл шаруашылығы өндірістік кооперативі құрылған. Максимовка, Бірлік және Белгород селолық округтерінің сүт қабылдау пункттері 100 тоннадан астам сүт қабылдады. Сондай-ақ, ірі қараның азығын дайындайтын екі ауыл шаруашылығы өндірістік кооперативі құрылыпты. Жайлаудағы малды сумен қамтамасыз ететін екі ұңғыма құдық қазылған.
–Мал шаруашылығын дамытуға 186 миллион теңге субсидия берілді. Жалпы 1,6 миллиард теңгенің мемлекеттік қолдауы көрсетілді. «Агробизнес-2020» бағдарламасы аясында өндіріс көлемі ұлғаяды. Биыл 4,9 мың тонна ет, 21,8 мың тонна сүт, 4,6 миллион дана жұмыртқа өндіруді жоспарлап отырмыз. «Есіл мининг» серіктестігі «Ақсоран» вольфрам-молибден кен орнын іздеу-барлау жұмысын жүргізуде. «Сандықтау Астық» серіктестігі 2 мың тонна ұн өндірді. Шағын және орта бизнес саласындағы 953 кәсіпорнында 6 мың адам жұмыс істейді. 206 жаңа жұмыс орны ашылды. «Тиімді жұмыспен қамту және жаппай кәсіпкерлікті дамыту» бағдарламасының үш бағыты жүзеге асырылды. Ауданның кәсіпкерлері 35 жәрмеңкеге қатысты,–деген Асылбек Исмағамбетов өткен жылы ауданда 5316 шаршы метр тұрғын үй, 200 орындық жаңа мектеп, жаңа мешіт, шіркеу пайдалануға берілгенін айтты. Балкашин-Шаңтөбе бағытындағы 9,4 шақырым автомобиль жолы жөнделді. Сандықтау селосындағы балалар үйінде жөндеу жұмысы жүргізілуде. Балкашин селосында 200 орындық жаңа мектеп пайдалануға берілді. Новоникольск және Лесной орта мектептеріне екі автобус, сондай-ақ, жергілікті бюджет есебінен 37 мультимедиялық қондырғы кешені сатып алынды. Шалғайда орналасқан 6 ауылдық мектепті жедел жұмыс істейтін интернетке қосу мәселесі шешілді. Жеке отбастарында ата-анасының қамқорлығынсыз қалған 57 жетім бала тәрбиеленуде. Бюджет қаржысы есебінен Максимовка орта мектебінің ғимараты күрделі жөндеуден өтті. «Свободный» серіктестігі Владимиров орта мектебін жөндеп берді. Жаз айларында Приозерный селосында балалардың «Достық» сауықтыру орталығы жұмыс істейді. Мұнда жыл сайын 400-ден астам бала дем-алады. Аудандағы медициналық қызмет «Денсаулық» мемлекеттік бағдарламасын жүзеге асыруға бағытталған. Астана қаласындағы Медициналық академияда аудан әкімінің гранты бойынша 8 студент оқиды. Өткен жылы ауданға 2 дәрігер келді. «Каменка и Д» және «Байдалы» серіктестіктері Васильев және Веселов ФАП-на жедел көмек автокөліктерін сыйлады. Орталық аудандық
аурухана ғимаратының күрделі жөндеу жұмысының жобалық-сметалық құжаттамасы жасалды.
–Биылғы жылы ауданда жел электр станциясы, астық қоймалары, мал бордақылау алаңы, екі 36 пәтерлік тұрғын үй, қоғамдық моншалар, жол бойындағы сервис нысандары мен спорт алаңдары салынбақшы. Балкашин селоішілік жол жүйесі жөнделеді,–деген аудан әкімі өзге де әлеуметтік салалардың жағдайы жөнінде айтып, тұрғындар қойған сауалдарға жауап берді.
Рамазан ТІЛЕУОВ,
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *