«Айбын» Президенттік полкінің үздік сарбазы – Көкшеден

Көкшетау қаласынан әскер қатарына шақырылған Дмитрий Савон Қазақстан Республикасының Мемлекеттік күзет қызметінің Астана қаласында орналасқан «Айбын» Президенттік полкі» 0112 әскери бөлімінде Отан алдындағы азаматтық борышын абыроймен өтеуде. Бұл әскери бөлім Қазақстан Республикасы Президентінің және өзге де басшы тұлғалардың қауіпсіздігін, маңызды мемлекеттік нысандардың күзетін жүзеге асыратын алдыңғы қатарлы әскери құрылым болып табылады.

Мерзімді жауынгерлік қызметті осы құрылымның қатарында атқару – сарбаздар үшін үлкен абырой, асқан жауапкершілік. Біздің жеке құрам қатарына еліміздің түкпір-түкпірінен, әр облыстардан денсаулық жағдайы, мінез-құлқы, жеке қасиеттері тұрғысынан үздік деп танылған жастар таңдалып алынады.
Қатардағы жауынгер Дмитрийдің осы қатардан табылғаны – оның туған жерінде, отбасы мен мектебінде, соңғы оқу орны мен еңбек ұжымында алған білімі мен тәрбиесінің жемісі деп білеміз. Кезекті әскерге шақыру кезінде осындай жастардың біздің бөлімге түсуі жергілікті Қорғаныс істері жөніндегі департаменттің тиянақты жұмысының нәтижесі екенін айта кету керек.
Дмитрий 1997 жылы 20 қыркүйекте Көкшетау қаласында дүниеге келген, 2013 жылы осындағы №17 орта мектепті бітіріп, әскер қатарына шақырылған. Ол әскери қызметінің бірінші күндерінен бастап, жауынгерлік өмірдің қыр-сырына төселуге зор ынтамен кірісті. Сөйтіп, Отанға деген жоғары патриоттық сезімімен қарулас достарына үлгі-өнеге бола білді. Өзіне жүктелген міндеттерді атқару кезінде белсенді, жауапты азамат ретінде танылды. Сөзі мен ісі бір жерден шыққан, еңбекқор, қарапайым мінезді. Жауынгерлік және құқықтық дайындық сабақтарында командирлерінен алған білімін қызмет барысында дұрыс қолдана біледі. Жауынгерлік дайындық нормативтерін әрдайым ең үздік бағаларға орындайды. Өзіне сеніп тапсырылған қарудың құрылымын, тактикалық-техникалық сипаттамасын, қызмет көрсету тәртібін жетік меңгергендіктен, нысана көздеу жаттығуларында да үздік нәтижелер көрсетіп жүр. Жауынгерлік кезекшілікте әрдайым қырағылық танытып, әскери міндетін жауапкершілікпен атқарғаны үшін бірнеше рет марапатқа ие болған.
Дмитрийдің Отан алдындағы азаматтық борышын абыроймен атқарып келе жатқаны туралы оның жерлестері білуі тиіс деп санаймыз. Бұдан сарбаздың әскер қатарында жақсы жетістіктерге жетуіне өз үлестерін қосқан ата-анасы, туған-туыстары мен жақындары, өскен ортасы, мектебі мен жоғары оқу орны, еңбек ұжымы да хабардар болуы қажет. Сонымен бірге, бұл болашақта мерзімді әскери қызметке шақырылуы тиіс жас ұрпақ өкілдерінің патриоттық сезімдерін арттырып, оларды отансүйгіштік рухта тәрбиелеу үшін де керек. Осының бәрін ескере келгенде, қатардағы жауынгер Дмитрий Игоревич Савонның әскер қатарындағы біз жазып отырған жетістігі өзіндей басқа замандастарына ой салып, көрікті Көкше жерінен оның ізін басатын алғыр да тәрбиелі жастар көптеп шыға береді деп сенеміз.
Бейбіт ӨТЕУОВ,
«Айбын» Президенттік полкі»
0112 әскери бөлімінің командирі.

Пікір қалдыру

Міндетті өрістер таңбаланған Обязательные поля помечены *