Көз тұнар Астананың келбетінен,
Есілдің толқынымен тербетілген.
Сәулет пен сұлулыққа табындырған,
Таппаспын сендей шаһар жер бетінен.
Сауырын Сарыарқаның сәнге бөлеп,
Кеудесін көкке керіп бой түзеген.
Арқаның апай төсін әнге бөлеп,
Асқақ қала Астана ой түзеген.
Қарасам Астанаға нұр тұнып тұр,
Ғажайып ғимараттар сыр құйып тұр.
Шағылып ай нұрына, күн нұрына,
Есілдің қос жағасы құлпырып тұр.
Мешіті «Нұр-Астана» дінге арна,
Пирамида, Бәйтерек, ол бақ орда.
Сыйғызған бар әлемді бауырына,
Жүрегі Астананың бол, Ақорда!
Келбеті ұлтымыздың дәл өзіңдей,
Береке, достық, бірлік ел көзіндей.
Осынау Астананың төрт айшығы,
Төрт таған өлең жолдың сөздеріндей.
Астана қиялдағы арман қала,
Тосатын жеңістерді алдан қала.
Өшпейтін жүрегіме махаббаттың,
Мәңгілік бедерлі ізін салған қала.
Ән шалқып аспанында Астананың,
Жайқалды жапырағы жас қаланың.
Елбасы мен Елорда, ел аманда,
Жұлдызы жарқырайды бас қаланың!
Жұмабай ЕСЕКЕЕВ,
ақын-жыршы, Қазақстан Республикасының мәдениет қайраткері.
