«Өрлеу» біліктілікті арттыру Ұлттық орталығы» АҚ филиалы – Ақмола облысы бойынша педагог қызметкерлердің біліктілігін арттыру институты бір айлық курс өткізді.
Бұл курс «Орыс тілінде оқытатын мектептердегі қазақ тілі мен әдебиеті пәні бойынша педагогтардың біліктілігін арттыру» деген тақырыппен көрікті Бурабай баурайында өтті. Оқудың алғашқы күнінен бастап білікті жетекшіміз Жанар Жамантаева бізге қазақ тілі мен әдебиеті пәнін оқыту барысында сабақта қолданылатын педагогикалық жаңа әдіс-тәсілдерді игеріп, сабақ мазмұнын байытуға бағыт-бағдар берді. Биылғы жаңартылған бағдарлама өзге тілде білім алатын оқушыларды өзара сөйлесу, еркін тілдесу арқылы тілді тереңірек меңгертуді көздейді. Бұл әрі еркін сөйлескеннен кейін оқушылар үшін жеңіл.
Сабақ барысында оқу стратегияларын қалай тиімді пайдалану керектігін топтық жұмыстарда талқыладық. Сонымен қатар, 5-7 сыныптарға арналған қысқа мерзімді сабақ жоспарын құрдық. Белсенді оқу әдістері, саралап оқыту, критериалды бағалау түрлері бойынша сабақ жоспарын қорғап, жан-жақтан келген ұстаздармен тәжірибе алмастық. Мұғалім сабақ үстінде оқушыларды оқытады және оларға тәлімді тәрбие беруге бар күш-жігерін салады. Ал, сабақтың сәтті шығуы дұрыс жоспарлауға байланысты екендігі де белгілі.
Бибігүл ТӨЛЕГЕНОВА,
Щучинск қаласындағы №1 мектеп-гимназиясының қазақ тілі мен әдебиеті пәнінің мұғалімі.
Бурабай ауданы.
