Облыстық іскер әйелдердің ІІ форумында Бұланды ауданының тұрғыны, жеке кәсіпкер Ғайни Ахметова өзі жасаған арнайы автокөлік жамылғысын Елбасына сыйға тартқысы келетінін айтты.
– Автокөліктің жамылғысына болашағымыздың рәмізі ретінде «Рухани жаңғыру» деген сөзді өрнектеп тіктім. Бүгінгі күні барлығымыз ел ертеңі үшін жауапты болуымыз қажет, – дейді ол ағынан жарылып. Ғайни автокөлік жамылғысы жинақтамасын бір айға жуық тікті. Әрленімі мен пішінін ойластырып, материалдарды мұқият таңдады. Іскер қыздың бұл талпынысы «Атамекен» кәсіпкерлер палатасының «Бастау Бизнес» жобасынан басталды. Ғайни осы жобаға қатысты оқуын биылғы жылдың маусымында тәмамдап, өзінің бизнес жобасын қорғады. Нәтижесінде шебер қыз қолдау қаржысына қол жеткізіп, жамылғылар тігу бойынша өз ісін ашты.
– Көктемде Бұланды ауданының кәсіпкерлікті қолдау орталығында болдым. Мұнда кеңесшілер «Бастау Бизнес» жобасы бойынша оқуды ұсынды. Бизнес-жаттықтырушымен бірге рынокты зерттеп, ұлттық нақышта автокөлік жамылғыларын тіккен пайдалы болады деп шештік. Кәсіпкерлер палатасы мамандарының қолдауымен әлеуметтік желілерге хабарландыру беріп, көп уақыт өтпей алғашқы тұтынушыларым келе бастады,– дейді Ғайни Ахметова.
Бүгінгі таңда шебер жаңа тапсырыстар қабылдауда. Келешекте жеке цех ашуды жоспарлап отыр. Өйткені, тіккен бұйымдары облыстан тыс өңірлерде де сұранысқа ие болып келеді.
«Арқа ажарының» өз ақпараты.
