Зеренді селосында орталық жылу қазандығының магистральді жылу құбыры жарылып, тұрғындар мен коммуналдық сала қызметшілерін біраз әбігерге салды.
Облыс әкімі баспасөз қызметінің дерегі бойынша, апат ағымдағы жылдың 17 қаңтарында кешкі сағат 20:00 шамасында орын алған. Осының салдарынан бір тұрғын үй мен дəмхана ғимараты жылусыз қалды. Апатты ауыздықтауға аудандық коммуналдық қызметтің 10 адамнан тұратын бригадасы жəне 2 арнайы техника (экскаватор, САК дəнекерлеу техникасы) жұмылдырылды. Оқиға орнына аудан әкімі Мереке Мұстафин барып, жөндеу жұмыстарын бақылауға алды. Бірер сағаттың ішінде жарылған жылу құбыры қалпына келтірілді.
Алайда, көп ұзамай 18 қаңтар күні таңғы уақыт 05:30 шамасында аталмыш құбыр тағы да жарылды. Бұл жолы жарылған құбырдан сыртқа көп су ағып, жекеменшік 50 тұрғын үй мен мектеп жылудан ажыратылды. Апатқа байланысты №1 Зеренді орта мектебінде сабақ уақытша тоқтатылды.
Қазіргі кезде төтенше жағдайдың зардабын жою жұмыстары аяқталып, қайтадан құбырға ыстық су жіберілуде. Мамандардың айтуынша, жарылған құбырдан 700 текше метр су далаға ағып кеткен көрінеді.
«Арқа ажарының» өз ақпараты.
Зеренді ауданы.
