Көкшетау сүт зауытында балмұздақтың жаңа түрі шығарыла бастады. Өнімді сапалы, дәмді, өтімді етіп өндіру жолында тәжірибелі мамандар жұмыс істейді. Өз ісінің шеберлері жылдар бойы сапасы өзгермеген балмұздақ әзірлеудің жаңа түріне сұраныстың жоғары болатынына сенеді.
Балмұздақтың жаңа түрін шығару үшін Чехия мен Италиядан қазіргі заманғы қондырғылар жеткізілген. Сәйкесінше, соған қарай жұмыс өнімділігі артып келеді. Мұнда тәулігіне 14 мыңға жуық түрлі балмұздақ дайындалады.
– 8 наурыздан бастап біз «Эскимо» балмұздағын шығара бастадық. Бізде оның түр-түрі жасалады. Қазір шоколадпен қапталған балмұздақ жасап жатырмыз. Алдағы уақытта жаңғақ қосылған шоколадтағы, сондай-ақ, кілегейлі шоколадтағы, таяқшадағы крем-брюле сияқты тағы да басқа түрлерін дайындау жоспарда бар,– дейді балмұздақ жасау цехының еңбеккері Валентина Войцеховская (суретте). Балмұздақтың сапалы болуы алдымен сүтке байланысты. Қабылданған сүт органикалық, физикалық, химиялық көрсеткіштер бойынша тексеріледі. Одан соң технологиялық өңдеуге жіберіледі. Тазартылып, қалыпқа келтіріледі.
– Біз балмұздақ технологиясына ғана емес, сонымен қатар оны дайындаудағы санитарлық талаптарға да аса мән береміз. Өйткені, тұтынушылардың сенімінен шығу үшін жұмыс істейміз,–дейді зертхана меңгерушісі Зарина Жақсылықова. Зауыттың табиғи өнімдері мен дәстүрге адалдығын тұтынушылар жоғары бағалайды. Бүкіл елге тарайтын кілегейлі пломбир, шоколадты балмұздақ дүкенде ұзақ тұрған емес. Зауытта сүт өнімдерінің 30-дан астам түрі шығарылады.
Жансұлу ЖИЕНҚҰЛ.
