Салауатты өмір салтына ынталандыру және жас қызметкерлерді қызметтің жаңа жағдайларына бейімдеу мақсатында жуырда Ақмола облысы төтенше жағдайлар департаментінің «Өрт сөндіру және авариялық-құтқару жұмыстары қызметі» мемлекеттік мекемесінде кәмелетке толмаған жастарды әлеуметтік-психологиялық, құқықтық қолдау орталығының психологтары Көгершін Сейтқожина мен Жанна Иманбаеваның шақырылуымен іс-шара ұйымдастырылды.
Іс-шара Көкшетау қаласының № 2 мамандандырылған өрт сөндіру бөлімінің ғимаратында өтті. Аталған іс-шараның бірінші бөлімі теориялық бөлімнен тұрды, сондай-ақ, психологтар қызметкерлерді қызықтырған сұрақтарға жауап берді. Бұдан әрі қызметкерлермен бірлесіп әрекет ету дағдыларын игеруге, ұжым ішіндегі қарым-қатынастарды оңтайландыруға және өнімді жұмыс процесіне қол жеткізуге бағытталған тренинг өткізілді. Өйткені ұжымдағы қолайлы ахуал табысты еңбек процесінің маңызды көрсеткіші. Жұмыс процесі және қызметкерлер арасындағы бірлескен өзара іс-қимылдың нәтижесі психологиялық жайлылыққа тікелей байланысты екені белгілі.
Соңында қызметкерлер өз әсерлерімен бөлісіп, тілектерін білдірді. Тренингке қатысушылардың айтуынша, олар көптеген жағымды әсер алды.
А.ТӨЛЕГЕНОВА,
Ақмола облысы төтенше жағдайлар департаменті өрт сөндіру және авариялық-құтқару қызметінің бас құтқарушы-психологы.
