«АMANAT» партиясы Ақмола облыстық филиалының кезекте тыс ХХХҮІ конференциясы өтті

«АMANAT» партиясы Ақмола облыстық филиалының төрағасы, облыс әкімі Ермек Маржықпаевтың төрағалығымен өткен кезекте тыс ХХХҮІ конференциясында партияның Саяси тұғырнамасының жаңа жобасы талқыланды.

Өңір басшысы өз сөзінде, «AMANAT» партиясының жаңа Саяси тұғырнамасы ағымдағы жылдың наурыз айында басталғанын және ол толық ауқымды партиялық трансформацияның бір бөлігі екендігіне назар аударды. «Тұғырнамада Қазақстанның басты қоғамдық күшінің болашаққа деген көзқарасы, даму бағдарлары, ұстанымдары мен саяси мақсаттары қамтылған.

Тұғырнама елімізде болып жатқан өзгерістерге «AMANAT» партиясының жауабы ретіндегі негізгі идеологиялық құжат»,-деді өз сөзінде Ермек Боранбайұлы.
Конференцияда алғашқы болып сөз сөйлеген партияның облыстық филиалының атқарушы хатшысы Айна Мысырәлімова жаңа саяси тұғырнаманың негізгі ерекшеліктеріне тоқталды. «Біріншіден, құжат толығымен мемлекеттік тілде әзірленіп, жазылды.

Екіншіден, саяси тұғырнама әрбір азаматтың әл-ауқатын арттыруға негізделіп, «адам – қоғам – мемлекет» қағидаты бойынша құрылған. Үшіншіден, құжатты әзірлеу мен талқылау қатардағы партиялықтан бастап партияның Орталық аппаратына дейінгі барлық деңгейде жүргізілді және жаңа платформада нақты проблемалық мәселелер көтеріліп, оларды шешудің пайымы белгіленді»,-деді өз сөзінде Айна Ермекқызы.

Ал, партияның Саяси кеңесінің Бюро мүшесі, Ақмола облыстық мәслихатының депутаты Сайра Матайбаева тұғырнаманың «Еңбек – табыстың кілті» бөліміне тоқталды. «Еліміздің тұрақты дамуының негізгі қозғаушы күші еңбек, білім және азаматтық белсенділік. Тұғырнамада айтылғандай, біз жұмыс орнындағы қауіпсіздікті бақылауды күшейтеміз, еңбек құқықтарының қорғалуын қамтамасыз етуге көңіл бөлеміз»,-деді. Айта кетейік,

Сайра Әйтенқызы, Қосшы қаласында жеке қаражатына 600 балаға арналған «Дара» бизнес мектебінің, балаларға арналған театр және спорт кешенінің іргетасын қалады. Көптеген жылдар бойы жиһаз өнідірісмен айналысып, өңірдің әлеуметтік-экономкиалық дамуына өзіндік үлесін қосып келеді.

«AMANAT» партиясы облыстық филиалының Саяси кеңесінің мүшесі, облыстық мәслихат депутаты Умар Шоназаров партияның тұғырнамасын барынша қолдайтынын айта отыра, алдағы уақытта ауылды аймақтарды дамытудың үкімет деңгейіндегі мемлекеттік бағдарламасын әзірлеудің қажеттігіне мән берді. «Құжатта ауыл тұрғындарының да тұрмыстық табысын арттыру мақсаты да айқындалған. Бұл орайда, партияның «Ауыл Аманаты» және «Жер Аманаты» жобалары жемісті іске асып жатқаны белгілі»,-деді ол.
«Расында, Саяси тұғырнамада партияның басым бағыттары айқын көрсетілген. Атап өтерлігі, әрбір адам лайықты білім мен медициналық көмек алуға, жеке қауіпсіздігінің қорғалуына, ыңғайлы әлеуметтік орта мен жайлы үйде тұруға құқылы екендігіне баса мән берілген.

Сондай-ақ, мемлекеттің тұтастығы, елдің татулығы мен бірлігі, қоғамның қауіпсіздігі басты назарға алынған. Шындығында, қоғамның басты қозғаушы күші жастар десек, тұғырнамада оларға айрықша сенім жүгі артылып отыр», -деді өз сөзінде жастардың атынан сөйлеген биология, қазақ тілі және қазақ әдебиеті пәндерінің оқытушысы Алена Малькова-Солопова. Партияның қатарына жаңадан қосылған жас ұстаз әрбір студентке жан басына шаққандағы қаржыландыру көлемін ұлғайту қажет деген ұсынысын жеткізді.

Сөйтіп, конференцияда «AMANAT» партиясының жаңа Саяси тұғырнамасы Ақмола облысының партия ұйымдарымен мақұлданды.
Конференцияда сондай-ақ, «АМАНАТ» партиясының кезектен тыс XXIV съезіне қатысуға Ақмола облысынан 35 адам делегат сайланды.

 662 Total Views,  2 Views Today

By admin

Добавить комментарий

Ваш адрес email не будет опубликован. Обязательные поля помечены *

Өзге де жаңалықтар