Бәрекелді!
Шағын және орта бизнес саласында еселі табыстарымен көрінген ақмолалық бір топ компаниялар «Қазақстанның үздік тауары» республикалық көрме-байқауының лауреаттары атанды. Астанада жыл сайын отандық өнімдер мен қызметтердің сапасын бағалайтын Президенттің «Алтын сапа» сыйлығының лауреаттарын марапаттау рәсімі өтті.
2006 жылдан бастап бұл іс-шара дәстүрлі түрде отандық бизнес үшін жылдың басты оқиғасына айналған.
Ел Президенті Қасым-Жомарт Тоқаев «Алтын сапа», «Парыз» және «Қазақстанның үздік тауары» байқауларына қатысқан кәсіпкерлерге алғыс айтып, лауреаттарға марапаттар табыстады.
«Парыз» байқауы бойынша Ақмола компаниялары бірден үш жүлделі орынға ие болды. Ірі кәсіпорындардың арасында «Үздік ұжымдық шарт» байқауында «RG Processing» ЖШС жеңімпаз атанды. Шағын және орта бизнес субъектілерінің арасында Көкшетау қаласынан «Гормолзавод» ЖШС «Үздік әлеуметтік-жауапты кәсіпорын» және облысымыздан «Айбат» ЖШС «Еңбекті қорғау саласындағы үздік кәсіпорын» байқауларында лауреат болып танылды.
Сонымен қатар, сапалы отандық өнімге сұранысты ынталандыратын және қазақстандық өндірушілердің позициясын нығайтатын «Қазақстанның үздік тауары» байқауының республикалық кезеңінің жеңімпаздарын да марапаттау рәсімі өтті. Онда Ақмола облысының екі кәсіпорны жеңімпаз атанды. «Бижан» ет өңдеу кешені» ЖШС «Үздік азық-түлік тауарлары» номинациясында үздік болса, «Азия сүзгі» ЖШС «Өндірістік мақсаттағы үздік тауарлар» номинациясында топ жарды.
–Күтпеген жерден бұл табыс біздің осындай беделді байқаудағы жеңісімізді екі есе құнды етеді. Мемлекет бүгінде бизнесті белсенді қолдайтыны ерекше қуантады. Президенттің мемлекеттік қолдау шаралары одан да тиімді болатыны туралы сөздері біз үшін өте маңызды. Мәселен, биыл «Бәйтерек» холдингі желісі бойынша шағын және орта бизнесті қолдау көлемі екі триллион теңгені құрады. Бұл ретте, басымдық тікелей субсидиялаудан кепілдік беру құралдарына ауысады. Болашақта отандық шикізатты пайдаланатын және озық технологиялар мен инновацияларды енгізетін экспорттық нарықтарда бәсекеге қабілетті кәсіпорындарға басымдық берілетін болады. Мемлекет басшысы өз сөзінде іскерлік белсенділікті одан әрі ынталандыру үшін өңірлік мамандандыруды және кәсіпкерлерге атаулы көмекті көздейтін шағын бизнесті қолдаудың бірыңғай бағдарламасын қабылдау қажет екенін атап өтті. Тәжірибе көрсеткеніндей, жергілікті өнімге, білімге және заманауи технологияларға назар аудару бұл біз, өндірушілер үшін тиімді болып отыр. Ол алда да айтарлықтай нәтиже береді деп сенеміз, – дейді «Бижан» ет өңдеу кешені» ЖШС директоры Шәкихан Антаев.
–Бұл жетістіктер Ақмола компанияларының жоғары деңгейін және олардың ұлттық нарықта табысты бәсекелесетін сапалы өнімдер шығару қабілетін көрсетеді, – деп атап өтті өз кезегінде Ақмола облысы кәсіпкерлер палатасы директорының орынбасары Гүлден Хаметова.
«Арқа ажарының» өз ақпараты.
