Қазақстан Республикасының Президенті жанындағы Орталық коммуникациялар қызметінің алаңында Қазақстан Республикасының Бас санитарлық дәрігерінің жаңа қаулысына және коронавирустық инфекцияның ағымдағы жағдайына байланысты баспасөз конференциясы болып өтті.
Баспасөз мәслихатында мәлімдеме жасаған Қазақстан Республикасының мемлекеттік бас санитарлық дәрігері Айжан Есмағамбетованың айтуынша, соңғы тәулікте елімізде тіркелген 369 науқастың 91-і шет елден келгендер. Ал, қалған анықталған науқастар індет жұқтырғандармен байланыста болған адамдар.
Сондай-ақ, бас санитарлық дәрігер Қазақстанда коронавирус инфекциясының таралуының алдын алу мақсатында енгізілген қаулыға байланысты түсініктеме берді.
–Қаулы бойынша мемлекеттік шекарадағы блок-бекеттерде санитарлық карантиндік бақылау басты назарда болуы тиіс. Әсіресе, ел ішіндегі індетке қарсы шаралар күшейтіледі. Қаулыға сәйкес елімізге шетелден келгендер 3 күн бойы лабораториялық зерттеулер жүргізу үшін оқшауланады. Егер қан талдамалары теріс нәтиже көрсетсе, онда олар 14 күнге үй карантиніне жіберіледі. Ал, вирус анықталған жағдайда олар инфекциялық стационарларға жатқызылады, – деді Айжан Есмағамбетова. Сонымен қатар, ол өз хабарламасында, коронавирустан қайтыс болғандар қалай жерленетінін де айтты.
– Мен арнайы қаулымен коронавирус жұқтырғандарды жерлеу рәсімінің алгоритмін бекіттім. Коронавирус инфекциясынан қайтыс болғандардың денесі туысқандарына берілмейді. Қоштасуға тек 30 минут қана уақыт беріледі. Ара қашықтық 3 метрден кем болмауы керек. Жерлеу рәсіміне жақын туыстары мен имам қатыса алады, – деді бас санитарлық дәрігер.
Асылай ҚАДЫРҚЫЗЫ,
«Арқа ажарының» өз тілшісі.
