Барша адамзат баласы коронавирус ауыртпалығымен бетпе-бет келіп отырған қазіргідей қиын-қыстау кезеңде ауданның жомарт азаматтары әлеуметтік аз қамтылған отбасыларына қол ұшын беруде.
Аудандық мәслихат депутаты, «Агро Likе» жауапкершілігі шектеулі серіктестігінің директоры Андрей Галюк Приозерный ауылында еңбек ардагерлері мен зейнеткерлер тұратын екі пәтерлі тұрғын үйдің шатырын жөндеуге қаржылай көмек көрсетті. Айта кетейік, үйдің шатыры жуырда болған дүлей дауылдың салдарынан опырылып түскен еді.
Ал, Веселый селолық округінің тұрғындарына «Жыланды-2004» серіктестігінің директоры Ілияс Съезбеков тегін ұн таратты. «Колос», «Золотая Нива» серіктестіктерінің басшысы Спиридон Джейранов Васильевка және Тучной ауылдарында тұратын тыл еңбеккерлері мен мүгедектерге, жалғызілікті қарттарға және толық емес отбасыларына демеушілік көрсетіп, аталған отбасылардың барлығы 25 келілік бір-бір қаптан ұн алды.
Ауданда осындай қайырымдылық істер жайлы мысалдарды көптеп келтіруге болады. «ПЗ Балкашинский», «Байдалы», «Белгородское», «Мәдениет» серіктестіктерінің, «Сұлтан» шаруа қожалығының жетекшілері мұқтаж жандардан көмектерін аянып қалып жатқан жоқ. Волонтерлердің де игі шаралардың бір жағынан шығысып жатқанын айта кету қажет. Еріктілер Сандықтау ауылдық мәдениет үйінің шатырын қалпына келтіруге көмектесті. Бір сөзбен айтқанда, тұрғындардың жергілікті жердегі кәсіпкер азаматтарға, қайырымды жандарға алғыстары шексіз.
Венера ТАЛҒАТҚЫЗЫ,
«Арқа ажарының» өз тілшісі.
Сандықтау ауданы.
