Жерде өскен дәнді жерге қалдырмауға ұмтылған облыс диқандары егістік алқаптарының 64,4 пайызын бастырып үлгерді. Гектар берекесі 10,5 центнерден айналуда.
Жауапты науқанға Жарқайың, Есіл, Жақсы, Атбасар аудандары тәрізді далалық жерлерге дән еккен диқандар бірінші кіріскен болатын. Қазір бұл өңірлердегі кейбір ауыл шаруашылығы құрылымдары орақ жұмысын еңсеріп тастады. Ал, орман-тоғайы қалың Бурабай, Бұланды, Біржан сал, Сандықтау өңірлері егін орағын сәл кейіндеу бастаған болатын. Алқапқа комбайн кірген бетте жаздың соңында жауын-шашын мол болуына байланысты дән ылғалды болды. Негізгі күш элеваторлар мен астық сақтайтын қоймаларға түсетін болғандықтан, ертеңгі күні қалай болар екен деген алаңдаушылықтың орын алғаны да рас.
–Облыста бастырылған дәнді сақтауда мәселе жоқ, – дейді облыстық ауыл шаруашылығы басқармасы басшысының орынбасары Еркеш Әленов, – өткен қуаңшылық жылмен салыстырғанда гектар берекесі көңіл тоғайтарлық. Жұмыс қарқыны да жақсы. Облыстағы ауыл шаруашылығы құрылымдары машина-трактор паркін біршама жаңартқаннан кейін іс те өнік. Биыл егін орағына 8700 комбайн қатысып жатса, оның 4,5 мыңы алымдылығы жоғары шетелдік техникалар.
Соңғы күндері күн ашылып, дән сабағында тұрып кеуіп жатыр. Сондықтан, далалық жерлердегі ауыл шаруашылығы құрылымдары жиналған астықты бұрынғыдай элеваторларға тасымалдап жатқан жоқ, өздерінің қоймаларында сақтауда. Сөз арасында шаруалардың 2 миллион тоннаға жуық астықты өз қамбаларында жинайтын мүмкіндігі бар екендігін айта кетуіміз керек.
«Арқа ажарының» өз ақпараты.
