Жұмыспен қамту қашанда маңызды. Дана халқымыз «қолы қимылдағанның аузы қимылдайды» деп бекер айтпаған. Үстіміздегі жылы өңірде 31 мың жаңа жұмыс орнын ашу көзделсе, оның 25 мыңы тұрақты жұмыс орны.
Бұл санамен салмақтаған жанға әншейін құрғақ цифрлар ғана емес, ойға алған оңды жоспар оңынан оңғарылса, отыз мыңнан астам адам отбасын асырайтын, әлеуметтік-тұрмыстық жағдайын біршама түзейтін нәтижелі жұмысқа орналаспақ. Сондықтан да, бұл бағыттағы атқарылып жатқан, әлі де жүзеге асырылатын жоспардың жүгі ауыр. Аймақтық жұмыспен қамту картасы аясында үстіміздегі жылдың қыркүйек айының орта шеніне дейін 24243 жаңа жұмыс орны ашылды.
Бұл орайда атқарылған шаруаны екшеп, саралайтын болсақ, алдымен ұлттық жобаларды жүзеге асыру бағытында оң сипаттың бар екендігін айқын аңғаруға болады. 299 инфрақұрылым жобасын жүзеге асыру барысында 5767 жұмыс орны ұйымдастырылған, оның 2179-ы тұрақты, 3588-і уақытша. Уақытша болғанымен адамдар тәп-тәуір табыс тауып, жағдайларын жақсартуға қол жеткізді. Ал, тұрақты жұмыс қашанда мәртебелі. Жаңа жұмыс орындары қай тарапта жүзеге асырылып жатыр дейтін сауалға жауап беретін болсақ, ең алдымен кәсіпкерлікті дамыту барысында жақсылық нышанының көбірек екендігін байқауға болады. Өңір туризмге өте қолайлы. Бұл сала жылдан жылға тәп-тәуір дамып келе жатыр.
Туристерге қызмет көрсету нысандарының көбеюімен бірге, сапасы да жақсара түсуде. Әлі де бұл бағытта қыруар жұмыс орындарын ашуға мол мүмкіндік бар. Есепті кезең ішінде туризм саласында 197 жаңа жұмыс орнын ашу көзделген. Қыркүйек айының соңына дейін жоспар 66 пайызға орындалыпты. Сондай-ақ, сапалы білім беру төңірегінде де жаңа жұмыс орындары ашылуда. Тұтастай шиырып айтқанда, 388 жұмыс орны ашылған. Сондай-ақ, «Жасыл Қазақстан», «Агроөнеркәсіп кешенін дамыту» бағыттарында да ауыз толтырып айтуға лайықты табыс бар. Айталық, агроөнеркәсіп кешенінде 1500 жаңа жұмыс орнын ашу көзделсе, бұл жоспар 118,6 пайызға орындалып, 1779 жаңа жұмыс орны пайда болған. Алдағы уақытта ауыл шаруашылығы тәп-тәуір дамыған өңірде табысы қомақты жаңа жұмыс орындарын көбірек ұйымдастыруға әбден болады. Демек, осы салаға көбірек күш салған жөн.
Субсидияланатын жұмыс орындарын ашу бағытында да ілгерілеу бар. Мәселен, үстіміздегі жылдың 21 қыркүйегіне дейін 2773 адам жұмысқа орналастырылған. Бұл бағыттағы жұмыс ауқымы 115,3 пайызға орындалды. Қоғамдық жұмысқа 1446 адам тартылған, әлеуметтік жұмыс орындарына 348 адам орналастырылған. 529 жас алғашқы тәжірибеден өтті. «Күміс жас» бағдарламасы бойынша 200-ге жуық адам жұмыспен қамтылып отыр. Бірер мысал келтіре кетуге де болады. Аршалы ауданындағы Волгодоновка селолық округінің тұрғыны Сандуғаш Икімова жергілікті әкімдікке жұмысқа орналастырылса, Баянбай Шанбаев «Балу» шаруа қожалығында агроном болып еңбек етуде.
Жұмыспен қамтудағы өзекті мәселе, жаңа мамандықты меңгеру. Үстіміздегі жылы 443 жұмыссыз адам жұмыс берушілердің ұсыныстарына орай қысқа мерзімді кәсіби даярлау курстарын аяқтады. Сұранысқа ие тігінші, аспазшы, шаштараз тәрізді мамандықтарды игерген жұмыссыздар жұмысқа орналасуда. Мәселен, Атбасар ауданының тұрғыны Жанат Жанулин газэлектрдәнекерлеуші мамандығын игергеннен кейін «Қамқор Локомотив» жауапкершілігі шектеулі серіктестігіне шақырту алды. Мұндай мысалдарды көптеп келтіруге болады.
141 адам грантқа ие болды. Оның ішінде мүмкіндігі шектеулі адамдармен бірге көпбалалы отбасылардың мүшелері де бар. Тарихи Отанына оралған қандастарымыз да жұмысқа орналастырылуда. Мүмкіндігі шектеулі 19 жасөспірімге қамқор болып отырған отбасы мүшелері де жақсылықтың шарапатын көрді.
Бұған дейін жұмыссыз жүрген жастарды пайдалы еңбекпен қамту тарапында қыруар жұмыс атқарылды. Жалынды жастардың бойындағы күш-жігер ел игілігі үшін жұмсалатын болады.
Байқал БАЙӘДІЛОВ.
