ҚР Мемлекеттік қызмет істері агенттігінің Ақмола облысы бойынша департаменті мүгедектігі бар мемлекеттік қызметшілердің құқықтарының сақталуына талдау жүргізді.
Талдау барысында Ақмола облысының мемлекеттік қызмет жүйесінде мүгедектігі бар 65 адам жұмыс істейтіні анықталды. Оның ішінде 13 қызметшінің І және ІІ топтағы мүгедектігі бар. Жергілікті атқарушы органдарда осындай 6, орталық мемлекеттік органдардың аумақтық бөлімшелерінде 6 және өкілді органдарда 1 қызметші еңбек етеді. Үш адам басшылық лауазымдарды атқарады.
Деректерді зерделеу қорытындысы бойынша мүгедек адамдардың құқықтарын бұзудың 6 фактісі анықталды, атап айтқанда, жұмыс беруші мұндай қызметшілерге қатысты жұмыс уақытының қысқартылған режимін белгілемеген. Осыған байланысты департамент талдау қорытындысы бойынша мемлекеттік органдардың басшыларына бұл заң бұзушылықтарды жою туралы ақпараттық хат жолдады. Департаменттің осы хаты негізінде аталған адамдарға жұмыс уақытының қысқартылған кестесі белгіленді.
Әнуар ОМАРОВ,
ҚР Мемлекеттік қызмет істері агенттігінің Ақмола облысы бойынша
департаменті мемлекеттік қызмет саласындағы бақылау басқармасының басшысы.
