Даму мен өркендеудің мүмкіндігі мол

Аршалы ауданының әкімі Талғат Мұханбеджанов өңірдің 2018 жылғы әлеуметтік-экономикалық дамуының қорытындылары және биылғы жылға белгіленген міндеттер туралы тұрғындар алдындағы есеп беру кездесуін өткізді. Кездесуге облыс әкімінің орынбасары Қанат Ыдырысов, облыстық және аудандық мәслихат депутаттары, селолық, ауылдық округ әкімдері мен аудандық салалық қызмет басшылары, аудан тұрғындары қатысты.

Аудан әкімі жылдағы дәстүр бойынша тұрғындар алдындағы есеп беру кездесуін Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауы мен «Ұлы даланың жеті қыры» мақаласында айтылған міндеттерден бастады.
– Елбасы алға қойып отырған міндеттерді орындау үшін бізде барлық мүмкіндіктер бар. Астананың іргесінде орналасқан Аршалы өңірінде денсаулық сақтау, білім беру және тұрғын үй-коммуналдық шаруашылығы салаларын дамыту ұдайы назарда ұсталады, – деді Талғат Мұханбеджанов.
Аудан әкімі атап өткендей, өткен жылғы әлеуметтік-экономикалық дамуының көрсеткіштеріне қарағанда аршалылықтардың әл-ауқатын арттыру бағытында жүзеге асырылып жатқан шаралардың ауқымы зор екенін байқауға болады. Аудан экономикасына ауыл шаруашылығы, агроөнеркәсіп, құрылыс сияқты салалардың қосар үлесі зор.
– Бүгінгі таңда ауданда 1327 шағын және орта бизнес нысаны жұмыс істейді. Бұл алдыңғы жылмен салыстырғанда 108,2 пайыз. Кәсіпкерлердің аудан экономикасындағы үлес салмағы өсіп, сауда айналымы 2,8 пайызға өсті, – деді аудан әкімі.
«Нәтижелі жұмыспен қамтуды және жаппай кәсіпкерлікті дамыту» бағдарламасы бойынша 2018 жылы «Бас-тау – бизнес» жобасы іске қосылды. Осы арқылы 110 адам арнайы курстан өтті. 2016-2020 жылдарға арналған Аршалы ауданы аумағын дамыту бағдарламасы шеңберінде Волгодон селолық округінде құны 830 миллион теңге болатын көкөніс қоймасы және балық шаруашылығы бар жылыжай кешені салынса, Жібек жолы ауылында құны 500 миллион теңгенің бетон және жағатас өндіретін зауыттың құрылысы жоспарланған. Аршалы ауданында ең басты стратегиялық міндеттердің бірі, әрине, «Индустриялық-инновациялық даму» бағдарламасы екені белгілі.
– Қазіргі күні 36 кәсіпорын ырғақты жұмыс істеуде. Оның басым көпшілігі темірбетон өнімдері, қиыршық тас, құм сияқты құрылыс материалдарын өндіретін кәсіпорындар. «Қазшпал» акционерлік қоғамы мен «Аркада Индастри» жауапкершілігі шектеулі серіктестігі өткен жылы 4 миллиард теңгенің өнімін шығарды. Бұдан бөлек, «Жібек жолы Агросервис» серіктестігі 2500 тонна және «Ерейментау Ақбас» серіктестіктері де табысты жұмыс істеуде. Аудан экономикасына 34,1 миллиард теңге инвестиция тартылды. Осының арқасында өнеркәсіп саласында біршама өсім болды, – деп атап өтті Талғат Мұханбеджанов.
Ауданда халық саны күн санап өсіп келе жатқандықтан, баспана мәселесі өткір болып отыр. Осы орайда, ауданда үй құрылысы саласын дамытуға жеткілікті көңіл бөлінуде. Сонымен қатар, денсаулық сақтау, білім, мәдениет нысандарын салу және күтіп ұстау жұмыстары да ұдайы назарда. Ауданда су жəне электрмен жабдықтау мəселесін шешу қолға алынуда.
Әкімнің баяндамасынан кейін тұрғындар тарапынан да кейбір өзекті мәселелер бойынша сауалдар қойылды.
Оның ішінде, жол жөндеу, жастарға бас-пана салу, №2 орта мектепті жөндеу, Волгодон ауылында мәдениет үйін қалпына келтіру, дене шынықтыру-сауықтыру кешенін салу сияқты мәселелер бар. Аудан әкімі тұрғындар тарапынан қойылған сауалдардың біразына сол жерде жауап берсе, қалғандарын хаттамаға енгізіп, өз бақылауына алатынын атап өтті.
Кездесуді қорытындылаған облыс әкімінің орынбасары Қанат Ыдырысов облысымызда жүзеге асырылып жатқан әлеуеті зор мемлекеттік бағдарламаларға тоқталды. Сондай-ақ, әр салада өңірдің әлеуметтік-экономикалық дамуына елеулі үлес қосқан бір топ аршалылықтарға түрлі марапаттарды табыс етті. «Гуля П.И.» шаруа қожалығының басшысы Петр Гуля «Еңбек ардагері» медалімен, «Агрофирма Поиск» серіктестігінің басшысы Александр Гусев, «Михайловский» серіктестігінің басшысы Эльман Алиев, «Арай» шаруа қожалығының басшысы Берік Оспанов I-ші дәрежелі «Еңбек данқы» салалық төсбелгісімен марапатталды.

Аслан ОСПАНОВ,
«Арқа ажарының» өз тілшісі.

Пікір қалдыру

Міндетті өрістер таңбаланған Обязательные поля помечены *