Латын әліпбиіне көшу – еліміз үшін маңызды шешімдердің бірі. Ал, тіл – халқымыздың негізгі ұлттық коды. Латын әліпбиіне көшу – қазақ халқының алға жылжуына, жаңа заман талабына сай өсіп-өркендеуіне, болашақта еліміздің жан-жақты дамуына үлкен үлес қосып, жемісі мен жеңісін әкелері сөзсіз.
Латын әліпбиінің жаңа нұсқасы – бүкіл халықтың таңдауының жарқын нәтижесі. Ол – Ұлы дала елін әлемдік өркениетпен қабыстыратын алтын көпір. Осы әліпбиге оралу заман талабынан туындап отырған қажеттілік. Латын әліпбиіне көшу ХХІ ғасырдың жалынды жастары үшін ешқандай қиындық тудырмайды деп сенімді айтуға болады.
«Рухани жаңғыру негізі – мемлекеттік тіл» тақырыбымен танымдық дәрістер марафоны басталып кетті. Бұл іс-шара облыстық ішкі саясат басқармасы жанындағы Ақмола облыстық оқу-әдістемелік орталығының және Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің Ақмола облысы бойынша департаментінің жұмыс жоспары бойынша өтуде.
Облыстық басқармалар мен департаменттерде танымдық дәрістер мен практикалық жұмыстар жүргізілуде. Атап айтсақ, облыстық сәулет және қала құрылысы, ветеринария, денсаулық сақтау, жер қатынастары, мәдениет және мұрағаттар, білім, жолаушылар көлігі және автомобиль жолдары басқармалары белсенділік танытуда.
Мекеме қызметкерлерін латын графикасына негізделген қазақ әліпбиімен таныстыру және насихаттау жұмыстары ұйымдастырылуда. Облыстық ішкі сая-
сат басқармасы тілдерді дамыту және ономастика бөлімінің қызметкерлері облыстық басқармаларға барып, латын графикасына негізделген қазақ әліпбиі жөнінде баяндама жасап, мекеме қызметкерлерінің қойған сұрақтарына жауап беруде. Орталық оқытушылары қазақ жазуының тарихына тоқталып, латын графикасына кезең-кезеңімен көшуіміздің себептерін түсіндіруде. Әуелі теория жағынан дәріс жұмыстарын жүргізіп, ал келесі практикалық бөлігінде латын негізді қазақ тілінің жаңа емле ережелерін түсіндіру жұмыстарын өткізіп жатыр.
Біз латын әліпбиіне көше отырып, өркениетті елдердің қатарына қосылып, тіліміздегі дыбыстық жүйелерді нақ анықтап, тіліміздегі артық кірме сөздерден арыламыз. Сондықтан, латын әліпбиіне көшу біз үшін де, болашақ үшін де маңызды дегіміз келеді.
Ләззат ҚОҚЫШЕВА,
Ақмола облыстық оқу-әдістемелік орталығының оқытушысы.
